எமது தேசத்தை கட்டியெழுப்பக்கூடிய வல்லமையும் திடவுறுதியையும் கொண்ட தலைவர்களை உருவாக்கி அவர்களை எதிர்காலங்களில் கரங்களில் ஒப்படைக்கும் அரிய பணியை நாம் நிறைவான மனதுடன் முன்னெடுத்துச் செல்வோம் என வன்னி மாவட்ட பாராளுமன்ற உறுப்பினரும் புனர்வாழ்வு மீள் குடியேற்றம் வடக்கு அபிவிருத்தி முன்னாள் பிரதி அமைச்சருமான கெளரவ காதர் மஸ்தான் அவர்கள் குறிப்பிட்டார்.
புத்தளம் மணல்தீவு றோ.க.த.கலவன் பாடசாலையில் நடைபெற்ற சிறுவர் தின நிகழ்வில் பிரதம அதிதியாக கலந்து கொண்டு உரையாற்றும் போதே இவ்வாறு தெரிவித்தார்.
பாடசாலை அதிபர் ஏ.டீ. நிக்ஸன் நோயல் தலைமையில் இடம்பெற்ற இந் நிகழ்வில் அவர் மேலும் குறிப்பிட்டதாவது.
பாடசாலைகள் அரசியலால் பீடிக்கப்பட்டு அவதியுறுகின்ற அவலநிலையை அவதானிக்கிறோம். இந்த நிலை மாற்றப்படல் வேண்டும்.
சுயாதீனமாக முடிவெடுத்து முன்னேற்றப்பாதையில் வீறுநடை போடுகின்ற ஸ்தாபனங்களாக கல்விக் கூடங்கள் மாறுகின்ற போது நல்ல அறுவடைகளை நாம் பெற்றுக்கொள்ள முடியும்.
இப்பாடசாலையிலிருந்தும் சீர்மைமிக்க எதிர்காலத் தலைவர்கள் உருவாக வேண்டும் என ஆசிக்கின்றேன் எனவும் குறிப்பிட்டார்.
இந் நிகழ்வில் மேற்படி பாடசாலை பிரதி அதிபர் அருட்சகோதரி, லூசிஸ்டா. புத்தளம் மாவட்ட ஸ்ரீலங்கா சுதந்திர கட்சியின் பிரதேச சபை வேட்பாளர்களான, எம்.ரெஜினோல்ட் மற்றும் எஸ்.சிராஜ்
பாராளுமன்ற உறுப்பினரின் இணைப்பாளர்களான ஜனாப்.வாஜித் ஜனாப்.சபூர் உள்ளிட்ட பாடசாலை அபிவிருத்தி சங்க உறுப்பினர்கள் நலன்விரும்பிகள் மாணவர்கள் எனப் பலரும் கலந்து சிறப்பித்தமை குறிப்பிடத்தக்கது.
