இந்த நிகழ்வு, கலை மற்றும் கலாசார பீடாதிபதி பேராசிரியர் கலாநிதி எம். எம். பாஸில் தலைமையில் நடைபெற்றது. பொருளியல் மற்றும் புள்ளிவிபரவியல் துறைத்தலைவர் பேராசிரியர் கலாநிதி ஏ.ஏ.எம். நுபைல் நிகழ்வை ஒழுங்கமைத்து நெறிப்படுத்தினார். மேலும், முகாமைத்துவ மற்றும் வர்த்தக பீடாதிபதி பேராசிரியர் கலாநிதி ஏ. எம். எம். முஸ்தபா மேலும், பொருளியல் மற்றும் புள்ளிவிபரவியல் துறையின் சிரேஷ்ட விரிவுரையாளர்களான ஏ. பாத்திமா தஹாரா, கலிதீன் பாத்திமா றினோஷா, எம். என். பாத்திமா வாசீமா மற்றும் யூ. எல். மில்ஹானா ஆகியோரும் மாணவர்களும் நிகழ்வில் பங்கேற்றனர்.
இங்கு உரையாற்றிய பீடாதிபதி பேராசிரியர் கலாநிதி எம். எம். பாஸில், இந்த கல்விசார் நிகழ்வு, பொருளியல் துறையின் வளர்ச்சிக்கும் அறிவு பரிமாற்றத்திற்கும் முக்கியமான தருணமாக அமைந்துள்ளது என்றும் கொழும்புப் பல்கலைக்கழகத்தின் சிரேஷ்ட பேராசிரியர் கே. அமிர்தலிங்கம் அவர்களின் வருகை, பல ஆண்டுகளாக அவரது ஆய்வுகள் மற்றும் எழுத்துகள் மூலம் அறிவு பெற்றிருந்த மாணவர்களுக்கும் விரிவுரையாளர்களுக்கும் அவரை நேரடியாகச் சந்திக்கும் அரிய வாய்ப்பாக இருந்தது என்றும் நேரில் சந்திக்காதிருந்த போதிலும், அவரது கட்டுரைகள் பலரின் கல்வி மற்றும் ஆராய்ச்சி பயணத்தில் தாக்கத்தை ஏற்படுத்தியுள்ளன என்றும் தெரிவித்தார்.
மேலும், தமிழ் மற்றும் முஸ்லிம் சமூகங்களுக்கிடையிலான கல்வி மற்றும் கலாசார உறவு இந்நிகழ்வில் சிறப்பாகக் குறிப்பிடப்பட்டது. ஒருவரிடமிருந்து ஒருவர் கற்றுக்கொள்வது, அறிவை பகிர்ந்து கொள்வது மற்றும் கல்வி வழியாக உருவான சமூக இணைப்பு ஆகியவை உயர்கல்வி மற்றும் ஆய்வுகளில் பிரதிபலிக்கின்றன என்றும் தெரிவித்தார். இந்த ஒற்றுமை, அறிவு வளர்ச்சிக்கும் சமூக முன்னேற்றத்திற்கும் அடிப்படையாக அமைகிறது என்பதும் இங்கு வலியுறுத்தப்பட்டது.
கல்வி மற்றும் ஆராய்ச்சி தொடர்பாக, உண்மையான கல்வி என்பது சுயஆர்வம், ஆராய்ச்சி மனப்பாங்கு மற்றும் அறிவைப் தேடும் முயற்சியிலேயே அமைகிறது எனக் கூறப்பட்டது. நேரடி வழிகாட்டுதல் இல்லாத சூழலிலும், ஒரு ஆய்வாளன் தன்னிச்சையாகக் கற்றுக் கொண்டு குறிப்பிடத்தக்க சாதனைகளை அடைய முடியும் என்பதற்கு அனுபவங்கள் எடுத்துக்காட்டாக பகிரப்பட்டன. மாணவர்களை களஆய்வுகளுக்கு அனுப்பி சமூகத்தின் உண்மையான பிரச்சினைகளைப் புரிந்து கொள்ளச் செய்வதின் முக்கியத்துவமும் வலியுறுத்தப்பட்டது.
அத்துடன், சமூக விஞ்ஞானங்களில் விஞ்ஞான அடிப்படை அதிகம் கொண்ட துறையாக பொருளியல் திகழ்கிறது என்பதும், எதிர்காலத்தில் இந்த துறையைச் சேர்ந்த மாணவர்கள் நாட்டின் முன்னேற்றத்திற்கான முதுகெலும்பாக இருப்பார்கள் என்பதும் சுட்டிக்காட்டப்பட்டது. கணிதம், புள்ளிவிபரம் மற்றும் பகுப்பாய்வு திறன்களை மேம்படுத்திக் கொள்ளுதல் பொருளியல் மாணவர்களுக்கு அவசியமானது எனவும் வலியுறுத்தப்பட்டது.
மாணவர்கள் உலகளாவிய பொருளாதார விவாதங்களில் ஈடுபட வேண்டும் என்பதோடு, வெளிநாட்டு பொருளியல் நிபுணர்களுடன் தொடர்பு கொண்டு தங்கள் அறிவை விரிவுபடுத்த வேண்டும் என்பதும் கூறப்பட்டது. தங்களைத் தாங்களே மேம்படுத்திக் கொள்ளும் பொறுப்பு மாணவர்களுக்கே உண்டு என்பதும் இந்நிகழ்வின் முக்கியமான செய்தியாக அமைந்தது.
நிகழ்வின் முக்கிய உரையாற்றிய பேராசிரியர் கே. அமிர்தலிங்கம், உலகளாவிய மற்றும் உள்ளூர் பொருளாதார மாற்றங்கள் குறித்து ஆழமான பார்வையை இங்கு முன்வைத்தார். குறிப்பாக, இலங்கையின் பொருளாதாரம் தற்போது வெளிப்புற அதிர்வுகளால் (External shocks) மிகுந்த பாதிப்புக்கு உள்ளாகி வருவதாக அவர் சுட்டிக்காட்டினார். மத்திய கிழக்கு நாடுகளில் உருவாகும் அரசியல் மற்றும் பொருளாதார பதற்றங்கள், இலங்கையின் மூன்று முக்கிய வெளிநாட்டு வருமான ஆதாரங்களான தேயிலை (Tea), துணிநூல் (Textile), சுற்றுலா (Tourism) ஆகியவற்றை நேரடியாக பாதிக்கும் என அவர் விளக்கினார்.
அவர் மேலும், சுற்றுலாத்துறை பெருமளவில் மேற்கத்திய நாடுகளிலிருந்து மற்றும் மத்திய கிழக்கு வழித்தடங்களிலிருந்து வரும் பயணிகள்மீது சார்ந்திருப்பதால், அங்கு ஏற்படும் விமான போக்குவரத்து குறைபாடுகள் மற்றும் பாதுகாப்பு அச்சங்கள் காரணமாக இலங்கையின் சுற்றுலா வருவாய் குறையும் அபாயம் உள்ளதாகக் குறிப்பிட்டார். அதேபோல், வெளிநாடுகளில் பணிபுரியும் இலங்கையர்களிடமிருந்து கிடைக்கும் பணப்பரிமாற்றங்கள் (remittances) குறைவதன் மூலம் நாட்டின் அந்நியச் செலாவணி நிலையும் பாதிக்கப்படக்கூடும் என எச்சரித்தார்.
இலங்கையின் பொருளாதார அமைப்பு பலவீனமடைந்த நிலையில் இருப்பதாகவும், சிறிய அதிர்வுகளுக்குக் கூட அதிர்ச்சி அடையும் நிலையிலுள்ளதாகவும் அவர் கூறினார். எரிபொருள் விலை உயர்வு, வறட்சி காரணமாக மின்சார உற்பத்தி குறைவு, விவசாயத்துறையில் உர மற்றும் வளங்களின் பற்றாக்குறை போன்ற பல சவால்கள் ஒரே நேரத்தில் நாட்டை அழுத்துகின்றன என அவர் விளக்கினார்.
கல்வி மற்றும் பொருளாதார வளர்ச்சி இடையிலான இணைப்பு குறித்தும் அவர் கவலை வெளியிட்டார். இலங்கையில் இலவச கல்வி ஒரு சாதனையாக இருந்தாலும், அது வேலைவாய்ப்பு சந்தையுடன் பொருந்தாத நிலை உருவாகியுள்ளது என அவர் குறிப்பிட்டார். அதிகமான பட்டதாரிகள் உருவாகின்றனர்; ஆனால் அவர்கள் பொருளாதார வளர்ச்சிக்கு தேவையான துறைகளில் ஈடுபடுவதில்லை என அவர் சுட்டிக்காட்டினார்.
இதனுடன் தொடர்பாக, அவர் “General Graduates” மற்றும் “Dynamic Graduates” என்ற இரு வகை பட்டதாரிகளை விளக்கினார். அரசாங்க வேலைக்கு காத்திருக்கும் பொதுவான பட்டதாரிகளுக்கு மாறாக, திறன்களை மேம்படுத்தி, பல்வேறு வாய்ப்புகளைத் தேடி முன்னேறும் மாணவர்கள் தான் வெற்றி பெறுவார்கள் என அவர் வலியுறுத்தினார். ஆங்கிலம், கணிதம், புள்ளிவிபரம், கணினி திறன்கள் ஆகியவற்றை வளர்த்துக்கொள்ளுதல் பொருளியல் மாணவர்களுக்கு மிக அவசியம் எனவும் கூறினார்.
மேலும், தற்போதைய காலத்தில் ChatGPT மற்றும் செயற்கை நுண்ணறிவு (AI) கல்வித்துறையில் உருவாக்கும் சவால்களையும் அவர் எடுத்துரைத்தார். மாணவர்கள் முழுமையாக இத்தொழில்நுட்பங்களின் மீது சார்ந்து விடாமல், தங்களுடைய சிந்தனை திறனை வளர்த்துக்கொள்ள வேண்டும் என அவர் அறிவுறுத்தினார். இதனை சமாளிக்க புதுமையான மதிப்பீட்டு முறைகள் (innovative assessments) அவசியம் எனவும் அவர் குறிப்பிட்டார்.
நிகழ்வின் போது மாணவர்கள் பொருளாதார கொள்கைகள், வரிவிதிப்பு முறை, வேலைவாய்ப்பு சந்தை மற்றும் உலகளாவிய பொருளாதார நிலைமைகள் குறித்து பல கேள்விகளை எழுப்பினர். குறிப்பாக, முன்னேற்றமான வரிவிதிப்பு முறை (progressive taxation), IMF கொள்கைகள் மற்றும் இலங்கையின் தற்போதைய நிதிநிலை குறித்து ஆழமான விவாதங்கள் நடைபெற்றன.
மொத்தத்தில், இந்த விஜயம் தென்கிழக்கு பல்கலைக்கழகத்தின் பொருளியல் துறைக்கு அறிவு பரிமாற்றத்தையும், விமர்சன சிந்தனையை ஊக்குவிக்கும் ஒரு முக்கிய வாய்ப்பாகவும் அமைந்தது. மாணவர்களுக்கும் விரிவுரையாளர்களுக்கும் இது ஒரு பயனுள்ள மற்றும் நினைவிடத்தக்க கல்வி அனுபவமாக அமைந்தது.
0 comments :
Post a Comment