ஊழியர் சங்கத்தின் தலைவர் சி.எம். அஹமத் முனாஸ் தலைமையில் இடம்பெற்ற இந்நிகழ்வு, சங்கம் கடந்த 25 ஆண்டுகளாக மேற்கொண்ட அர்ப்பணிப்புமிக்க சேவைகளையும் அதன் வளர்ச்சிப் பயணத்தையும் நினைவுகூரும் முக்கிய நிகழ்வாக அமைந்தது. பல்கலைக்கழக ஊழியர்களின் நலன், உரிமைகள் மற்றும் தொழில்முறை முன்னேற்றத்திற்காக ஊழியர் சங்கம் ஆற்றிவரும் பங்களிப்புகளைப் போற்றும் நோக்கத்துடனும் இந்நிகழ்வு ஒழுங்குபடுத்தப்பட்டிருந்தது.
நிகழ்வின் போது, வெள்ளி விழாவை நினைவுகூரும் வகையில் வடிவமைக்கப்பட்டு சங்கத்தின் சிறப்பு இலச்சினை மற்றும் 25ஆவது ஆண்டு நினைவு முத்திரை பொறிக்கப்பட்ட புத்தகப்பைகள் உத்தியோகபூர்வமாக அறிமுகப்படுத்தப்பட்டதுடன், பல்கலைக்கழகத்தின் பல்வேறு பிரிவுகளில் பணியாற்றும் ஊழியர்களுக்கும் விநியோகிக்கப்பட்டன. இந்நினைவுப் பொருள், ஊழியர் சங்கத்தின் ஒற்றுமை, அர்ப்பணிப்பு மற்றும் சேவை மரபின் அடையாளமாகக் கருதப்படுகிறது.
இதன் தொடர்ச்சியாக, குறித்த நினைவுப் புத்தகப்பைகள் தென்கிழக்குப் பல்கலைக்கழகத்தின் உபவேந்தர் பேராசிரியர் கலாநிதி எஸ்.எம். ஜுனைடீன், பதில் பதிவாளர் எம்.ஐ. நௌபர் மற்றும் பதில் நிதியாளர் சி.எம். வன்னியாராச்சி ஆகியோருக்கு ஊழியர் சங்கத்தின் சார்பில் நினைவுப் பரிசாக வழங்கி வைக்கும் நிகழ்வு 2026 ஜூன் 2ஆம் திகதி இடம்பெற்றது. இந்நிகழ்வு, பல்கலைக்கழக நிர்வாகத்திற்கும் ஊழியர் சங்கத்திற்கும் இடையிலான நல்லுறவையும் பரஸ்பர ஒத்துழைப்பையும் மேலும் வலுப்படுத்தும் நிகழ்வாக அமைந்தது.
நிகழ்வில் ஊழியர் சங்கத்தின் பொதுச் செயலாளர் எம்.எம். முகம்மது காமில், பொருளாளர் ஏ.எம். ரினூஸ், உப தலைவர் கே.எல். இப்ராஹீம், நலன்புரிச் செயலாளர் (ஆண்) ஏ.ஆர்.எம். சியாம், நலன்புரிச் செயலாளர் (பெண்) ஏ.ஜி. பாயிஷா கியாஸ் உள்ளிட்ட நிர்வாக உறுப்பினர்கள் பலரும் கலந்துகொண்டு நிகழ்வை சிறப்பித்தனர்.
தென்கிழக்குப் பல்கலைக்கழக ஊழியர் சங்கம் கடந்த 25 ஆண்டுகளாக பல்கலைக்கழகத்தின் கல்வி, நிர்வாக மற்றும் சமூகச் செயற்பாடுகளுக்கு உறுதுணையாக இருந்து வருவதுடன், ஊழியர்களின் நலன்கள், தொழிலுரிமைகள் மற்றும் சமூகப் பாதுகாப்பு தொடர்பான பல்வேறு முன்னெடுப்புகளையும் வெற்றிகரமாக நடைமுறைப்படுத்தி வருகின்றது. இந்த வெள்ளி விழா ஆண்டு, சங்கத்தின் சாதனைகளை மீளாய்வு செய்வதற்கும், எதிர்காலப் பணித் திட்டங்களை வடிவமைப்பதற்கும் ஒரு முக்கியமான மைல்கல்லாகக் கருதப்படுகிறது.
வெள்ளி விழாவை முன்னிட்டு ஏற்பாடு செய்யப்பட்ட இந்த நினைவு நிகழ்வு, சங்க உறுப்பினர்களின் ஒற்றுமை, அர்ப்பணிப்பு மற்றும் பல்கலைக்கழக சமூகத்திற்கான பங்களிப்பை எடுத்துக்காட்டும் அர்த்தமுள்ள நிகழ்வாக அமைந்ததுடன், எதிர்காலத்திலும் ஊழியர் சங்கம் மேலும் பல சாதனைகளைப் படைக்க வேண்டும் என்ற வாழ்த்துகளையும் பாராட்டுகளையும் நிகழ்வில் கலந்துகொண்டோர் தெரிவித்தனர்.
0 comments :
Post a Comment