ஸ்ரீலங்கா சுதந்திரக் கட்சியில் இனி இணைந்து கொள்ளப் போவதில்லை என மேல் மாகாண சபை உறுப்பினர் ஹிருணிகா பிரேமசந்திர தெரிவித்துள்ளார். மக்கள் சந்திப்பொன்றில் கலந்து கொண்டு உரையாற்றிய போதே அவர் இவ்வாறு தெரிவித்துள்ளார்.
இதன்போது அங்கு தொடர்ந்தும் உரையாற்றிய அவர், எதிர்காலத்தில் சுதந்திரக் கட்சியில் இணைந்து கொண்டு வாக்காளர்களுக்கு துரோகம் இழைக்கப் போவதில்லை.
மஹிந்த ராஜபக்சவின் பக்கத்தில் இனி எந்தக் காலத்திலும் நிற்கப் போவதில்லை.
2013 ஆம் ஆண்டில் மேல் மாகாணசபைத் தேர்தலில் வெற்றியீட்டி கொலன்னாவ பிரதம அமைப்பாளர் பதவியை மஹிந்த ராஜபக்சவிடம் கோரியிருந்தேன்.
இதன்போது, ‘தந்தையைப் போன்று மரணிக்க விருப்பமா’ என மஹிந்த என்னிடம் கேள்வி எழுப்பினார்.
மஹிந்தவின் இந்தக் கேள்வி என்னை பெரிதும் அதிருப்தி அடையச் செய்தது. தந்தையை கொலை செய்த அடுத்த நாளே ஐக்கிய தேசியக் கட்சியில் இணைந்து கொள்ளத் தீர்மானித்தேன். எனினும் அப்போதைய ஆளும் கட்சி அமைச்சர்கள் சிலர் அதனைத் தடுத்தனர் எனவும் ஹிருணிகா பிரேமசந்திர தெரிவித்துள்ளார்.
