பங்களாதேஷூக்கு எதிரான முதலாவது சர்வதேச இருபதுக்கு20 கிரிக்கெட் போட்டியில் இலங்கை 2 ஓட்டங்களால் வெற்றியீட்டியுள்ளது.
சிட்டகொங்கில் நடைபெற்ற இந்தப் போட்டியில் முதலில் துடுப்பெடுத்தாட அழைக்கப்பட்ட இலங்கை 7 ஓட்டங்களுக்கு முதல் விக்கெட்டை இழந்தது.
ஆரம்பத் துடுப்பாட்ட வீரர் திலகரத்ன டில்ஷான் ஓட்டமின்றி ஆட்டமிழந்தார்.
அணித்தலைவர் டினேஷ் சந்திமால், குமார் சங்கக்கார, சீகுகே பிரசன்ன ஆகியோர் பங்களாதேஷ் வீரர்களின் அபார பிடியெடுப்பில் ஆட்டமிழந்தார்கள்.
சிறப்பாகத் துடுப்பெடுத்தாடிய குசல் ஜனித் பெரேரா தனது நான்காவது சர்வதேச இருபதுக்கு20 அரைச்சதத்தைக் கடந்தார்.
இறுதி நேரத்தில் அதிரடியாகத் துடுப்பெடுத்தாடிய நுவன் குலசேகர 21 பந்துகளில் 2 சிக்ஸர்கள் அடங்கலாக 31 ஓட்டங்களைப் பெற்றுக்கொடுத்தார்.
இலங்கை அணி 20 ஓவர்களில் 7 விக்கெட் இழப்புக்கு 168 ஓட்டங்களைப் பெற்றது.
வெற்றி இலக்கான 169 ஓட்டங்களை நோக்கி பதிலளித்தாடிய பங்களாதேஷ் சார்பாக முதல் விக்கெட்டில் 52 ஓட்டங்கள் பகிரப்பட்டன.
தமிம் இக்பால் 30 ஓட்டங்களையும், சம்சுர் ரஹ்மான் 22 ஓட்டங்களையும் பெற்று ஆட்டமிழந்தனர்.
ஷகிப் அல் ஹசன் 26 ஓட்டங்களுடன் ஆட்டமிழக்க, அபாரமாகத் துடுப்பெடுத்தாடிய அனாமுல் ஹக் 58 ஓட்டங்களைப் பெற்று இலங்கைக்கு சவால் விடுத்தார்.
இதன் போது கடைசி ஓவரில் பங்களாதேஷ் வெற்றிபெற 21 ஓட்டங்கள் தேவையாக இருந்ததுடன் 3 பௌண்டரிகளை விளாசிய அனாமுல் ஹக் இறுதிப் பந்தில் ஆட்டமிழக்க வெற்றி இலங்கை வசமானது.
இதன்படி 2 போட்டிகள் கொண்ட இந்த சர்வதேச இருபதுக்கு20 கிரிக்கெட் தொடரில் 1-0 எனும் கணக்கில் இலங்கை முன்னிலை வகிக்கிறது.
0 comments :
Post a Comment