கடந்த சில நாட்களாக கல்முனை வடக்கு ஆதார வைத்தியசாலையில் முஸ்லிம் பெண் ஊழியர்கள் அணியும் ஆடை தொடர்பில் ஏற்பட்ட சர்ச்சை மற்றும் அதனைத் தொடர்ந்து உருவான நிர்வாக ரீதியான சூழ்நிலையை அடுத்து, குறித்த 9 ஊழியர்களையும் தற்காலிகமாக வேறு வைத்தியசாலையில் கடமையாற்றச் செய்வதற்கு நடவடிக்கை எடுக்கப்பட்டிருந்தது.
இதன்படி, கல்முனை அஷ்ரஃப் ஞாபகார்த்த வைத்தியசாலைக்கு தற்காலிகமாக இடமாற்றம் செய்யப்பட்ட குறித்த முஸ்லிம் பெண் ஊழியர்கள் இன்று காலை வைத்தியசாலைக்கு வருகை தந்தனர்.
அவர்களை அஷ்ரஃப் ஞாபகார்த்த வைத்தியசாலை நிர்வாகத்தினரும், சக ஊழியர்களும் சுமுகமான முறையில் வரவேற்றதுடன், சிலர் மாலையிட்டு வரவேற்பும் வழங்கினர். இதன்போது, புதிய பணியிடத்தில் எவ்வித இடையூறுமின்றி கடமையாற்றுவதற்கான சூழல் ஏற்படுத்தப்படும் எனவும் தெரிவிக்கப்பட்டது.
குறித்த ஊழியர்கள் கல்முனை வடக்கு ஆதார வைத்தியசாலையில் சுகாதார சேவையில் ஈடுபட்டு வந்த நிலையில், ஆடை தொடர்பான விவகாரம் காரணமாக அவர்கள் எதிர்நோக்கிய பிரச்சினை சமூக மற்றும் அரசியல் மட்டங்களிலும் கவனத்தைப் பெற்றிருந்தது.
இந்த விவகாரம் தொடர்பில் பல்வேறு தரப்பினரும் தமது கருத்துக்களை வெளியிட்டிருந்ததுடன், ஊழியர்களின் பணியுரிமை, சீருடை நடைமுறை மற்றும் ஒவ்வொருவரினதும் உரிமைகள் ஆகியவற்றை கருத்திற்கொண்டு பிரச்சினைக்கு தீர்வு காணப்பட வேண்டும் எனவும் வலியுறுத்தப்பட்டிருந்தது.
இந்நிலையில், குறித்த 9 பெண் ஊழியர்களும் தற்காலிகமாக அஷ்ரஃப் ஞாபகார்த்த வைத்தியசாலைக்கு இடமாற்றம் செய்யப்பட்டுள்ளமை, அவர்களது வழமையான சுகாதார சேவையைத் தொடர்வதற்கான இடைக்கால நடவடிக்கையாக பார்க்கப்படுகிறது.
இன்று வைத்தியசாலைக்கு வருகை தந்த ஊழியர்களை அங்கு பணியாற்றும் ஊழியர்கள் மாலையிட்டு வரவேற்றமை, பணியிடச் சூழலில் சுமுகமான நிலைமையை ஏற்படுத்தும் முயற்சியாக அமைந்தது.
இதனிடையே, கல்முனை வடக்கு ஆதார வைத்தியசாலையில் ஏற்பட்டுள்ள ஆடை தொடர்பான சர்ச்சைக்கு நிரந்தரமானதும் அனைத்து தரப்பினராலும் ஏற்றுக்கொள்ளக்கூடியதுமான தீர்வு எப்போது எட்டப்படும் என்பது தொடர்பில் எதிர்பார்ப்பு ஏற்பட்டுள்ளது.
தற்காலிக இடமாற்றம் செய்யப்பட்டுள்ள குறித்த 9 முஸ்லிம் பெண் ஊழியர்களின் பணிநிலை, எதிர்கால கடமை ஒதுக்கீடு மற்றும் அவர்களை மீண்டும் கல்முனை வடக்கு ஆதார வைத்தியசாலையில் பணியில் ஈடுபடுத்துவது தொடர்பான அடுத்தகட்ட நடவடிக்கைகள் குறித்தும் கவனம் செலுத்தப்பட்டு வருகிறது.
இதற்கிடையில், குறித்த ஊழியர்கள் இன்று அஷ்ரஃப் ஞாபகார்த்த வைத்தியசாலையில் தமது கடமைகளை ஆரம்பித்துள்ளமை குறிப்பிடத்தக்கது.
0 comments :
Post a Comment