காரைதீவு ஸ்ரீ பத்திரகாளி அம்மன் ஆலயத்தின் வருடாந்த மகோற்சவமும் தீமிதிப்பு சடங்கும் பக்தி வெள்ளத்தில் நேற்று (10) சிறப்பாக நடைபெற்ற நிலையில், அம்மனின் மகிமையைப் போற்றும் “சக்திராகம்” எனும் 33 பக்திப் பாடல்களை உள்ளடக்கிய இறுவட்டு பக்தி பூர்வமாக வெளியிடப்பட்டது.
ஆலய வளாகத்தில் நடைபெற்ற இந்நிகழ்வில், ஆலய பரிபாலன சபையின் உப தலைவர் கே. தங்கவடிவேல் தலைமையேற்று கலந்து கொண்டார். நிகழ்வை புகழ்பெற்ற நெறியாளரும் இலக்கிய ஆளுமையுமான வித்தகர் விபுலமாமணி வி.ரி. சகாதேவராஜா வழிநடத்தினார்.
அம்மனின் அருளையும் ஆன்மிக உணர்வுகளையும் இசை வடிவில் மக்களிடம் கொண்டு சேர்க்கும் நோக்கில் உருவாக்கப்பட்டுள்ள இந்த “சக்திராகம்” இறுவட்டில் இடம்பெற்றுள்ள 33 பாடல்களுக்கும், நவீன இசைத் தொழில்நுட்பங்களைப் பயன்படுத்தி விபுலமணி இ. கோபாலசிங்கம் இனிமையான இசையமைப்பை வழங்கியுள்ளார். இறுவட்டின் முழுமையான ஒருங்கிணைப்பு மற்றும் நெறிப்படுத்தல் பணிகளை வித்தகர் விபுலமாமணி வி.ரி. சகாதேவராஜா மேற்கொண்டுள்ளார்.
இதற்கு முன்னர் “சக்திராகம்” பாடல்களின் முதல் மற்றும் இரண்டாம் தொகுதிகள் வெளியிடப்பட்டிருந்த நிலையில், தற்போது வெளியிடப்பட்டுள்ள மூன்றாவது தொகுதிக்கான பாடல்களை ஆலய தலைவர் கலாபூஷணம் விபுலமணி எஸ். இராமநாதன் இயற்றியுள்ளார். அவரது பக்தி உணர்வும் கவித்துவத் திறனும் பாடல்களில் வெளிப்பட்டு, பக்தர்களிடையே பெரும் வரவேற்பைப் பெற்றுள்ளது.
தீமிதிப்பு மகோற்சவத்தின் ஆன்மிகச் சூழலில் நடைபெற்ற இந்த இறுவட்டு வெளியீட்டு நிகழ்வு பக்தர்களுக்கு மேலும் சிறப்பூட்டியதுடன், ஆலய வரலாற்றில் நினைவுகூரத்தக்க நிகழ்வாகவும் அமைந்தது. நிகழ்வில் ஆலய நிர்வாகத்தினர், பக்தர்கள், கலை மற்றும் இசை ஆர்வலர்கள் எனப் பலர் கலந்துகொண்டு “சக்திராகம்” இறுவட்டின் வெளியீட்டை உற்சாகமாக வரவேற்றனர்.
இறுதியில், ஆலய செயலாளர் கே. கணேசலிங்கம் நன்றியுரை நிகழ்த்தி, இறுவட்டு உருவாக்கத்தில் பங்களித்த அனைவருக்கும் நன்றியைத் தெரிவித்தார்.
பக்தி, இசை மற்றும் ஆன்மிகத்தை ஒருங்கிணைத்து உருவாக்கப்பட்டுள்ள “சக்திராகம்”, அம்மன் பக்தர்களின் உள்ளங்களில் நிலைத்திருக்கும் ஓர் ஆன்மிக இசைப்பொக்கிஷமாக அமையும் என நிகழ்வில் கலந்து கொண்டோர் நம்பிக்கை வெளியிட்டனர்.
0 comments :
Post a Comment