இந்நிகழ்விற்கு இஸ்லாமியக் கற்கைகள் மற்றும் அறபு மொழிப் பீடத்தின் பீடாதிபதி அஷ்ஷெய்க் எம்.எச்.ஏ. முனாஸ் தலைமை தாங்கினார். தென்கிழக்குப் பல்கலைக்கழக உபவேந்தர் பேராசிரியர் கலாநிதி எஸ்.எம். ஜுனைதீன் கலந்துகொண்டு உரையாற்றியதுடன், கௌரவ அதிதியாக மாஹோ வலயக் கல்விப் பணிப்பாளர் அஷ்ஷெய்க் ஆர்.எம்.ஐ. முஹம்மது அலி ஜின்னா (நளீமி) பங்கேற்று சிறப்புரையாற்றினார். அத்துடன் நிகழ்வின் ஆரம்ப நிகழ்வாக ஒருங்கிணைப்பாளர் கலாநிதி எம்.சீ.எஸ். ஸாதிபாவின் வரவேற்புரை இடம்பெற்றது. தொடர்ந்து பேராசிரியர் கலாநிதி எஸ்.எம்.எம். நபீஸ், கலாநிதி ஏ.எம். றாசிக், மற்றும் ஏகாஸ் அமைப்பின் உப தலைவர் ஏ.என்.எம். ஜுனைத் உள்ளிட்டோர் உரையாற்றினர்.
நிகழ்வில் உரையாற்றிய உபவேந்தர் பேராசிரியர் ஜுனைதீன், அறபு கலைஎழுத்து என்பது வெறும் எழுத்தழகோ அலங்காரக் கலையோ அல்ல; அது ஒரு சமூகத்தின் பண்பாடு, ஒழுக்கம், நாகரிகம் மற்றும் ஆன்மீக மரபின் பிரதிபலிப்பாகும் எனக் குறிப்பிட்டார். குறிப்பாக குர்ஆனிய அறபுக் கலைஎழுத்து விஞ்ஞான, ஆன்மீகம் மற்றும் அழகியலை ஒன்றிணைக்கும் உயரிய இஸ்லாமியக் கலை வடிவமாக திகழ்கின்றது என்றும் அவர் வலியுறுத்தினார்.
அறபு மொழி உலகின் செழுமையான மொழிகளில் ஒன்றாகும் எனக் குறிப்பிட்ட அவர், அதன் கைஎழுத்துக் கலையை நேசித்து கற்றுக்கொண்டு பாதுகாத்து வளர்க்கும் இளம் தலைமுறையினரை ஊக்குவிப்பது காலத்தின் தேவையாகும் என்றார். மேலும், அல்குர்ஆனில் அறிவியல், வானியல், புவியியல், உயிரியல், சுற்றுச்சூழல் மற்றும் பிரபஞ்சம் தொடர்பான ஆழமான சிந்தனைகள் உள்ளடக்கப்பட்டுள்ளதை நினைவூட்டிய அவர், இஸ்லாமிய நாகரிகத்தில் அறிவியலும் கலையும் ஆன்மீகத்திலிருந்து பிரிந்திருக்கவில்லை எனக் குறிப்பிட்டார்.
முஸ்லிம் அறிஞர்கள் மருத்துவம், கணிதம், பொறியியல், வானியல், கட்டிடக்கலை மற்றும் புவியியல் உள்ளிட்ட பல துறைகளில் உலக நாகரிகத்திற்கு அளப்பரிய பங்களிப்புகளை வழங்கியுள்ளனர் என்றும், அதேபோல் அறபுக் கலைஎழுத்தும் முஸ்லிம் சமூகத்தின் படைப்பாற்றல், ஒழுக்கம் மற்றும் அழகுணர்வின் வெளிப்பாடாக வளர்ச்சி பெற்றதாகவும் அவர் தெரிவித்தார்.
இலங்கைச் சூழலில் அறபுக் கலைஎழுத்து முஸ்லிம் சமூகத்தின் சமய மற்றும் கலாசார அடையாளத்தில் தனித்துவமான இடத்தைப் பெற்றுள்ளதாகக் குறிப்பிட்ட அவர், பள்ளிவாசல்கள், மத்ரஸாக்கள், வீடுகள், அழைப்பிதழ்கள், வெளியீடுகள் மற்றும் சமய நினைவுச் சின்னங்களில் காணப்படும் அறபு எழுத்தழகுகள், நம்பிக்கையும் கலையும் ஒன்றிணைந்திருப்பதற்கான சிறந்த எடுத்துக்காட்டுகள் எனக் கூறினார்.
இன்றைய உலகில் அறபுக் கலைஎழுத்து பொருளாதார மற்றும் தொழில்சார் முக்கியத்துவத்தையும் பெற்றுள்ளதாகக் குறிப்பிட்ட அவர், கிராபிக் வடிவமைப்பு, டிஜிட்டல் ஊடகம், இஸ்லாமிய கட்டிடக்கலை, உட்புற அலங்காரம், துணி அச்சிடுதல், விளம்பரம், இலச்சினை வடிவமைப்பு மற்றும் கைவினைப் பொருள் தயாரிப்பு போன்ற பல துறைகளில் திறமையான கலைஎழுத்தாளர்களுக்கு பரந்த வாய்ப்புகள் காணப்படுகின்றன என்றார்.
அறபு மொழித் துறையினால் முன்னெடுக்கப்படும் பயிற்சிப் பட்டறைகள், போட்டிகள், கண்காட்சிகள் மற்றும் வழிகாட்டல் நிகழ்ச்சிகள் மாணவர்களின் திறமைகளை தேசிய மட்டத்திற்கு கொண்டு செல்லும் சிறந்த முயற்சிகளாக அமைந்துள்ளன என பாராட்டுத் தெரிவித்த அவர், இவ்வாறான நிகழ்வுகள் இளம் தலைமுறையினரிடையே கலை, கலாசாரம் மற்றும் சமய பாரம்பரியத்தின் மீதான ஆர்வத்தை வளர்க்கும் என்றும் கூறினார்.
தேசிய மட்டத்தில் நடத்தப்பட்டிருந்த இப்போட்டிக்காக நாடு முழுவதிலுமிருந்து 297 ஆக்கங்கள் கிடைத்திருந்தமை குறிப்பிடத்தக்க சாதனையாகும் எனத் தெரிவித்த அவர், பாடசாலை மட்டம், அறபுக் கல்லூரி மட்டம் மற்றும் பல்கலைக்கழக மட்டம் என மூன்று பிரிவுகளின் கீழ் நடைபெற்ற போட்டி, அறபுக் கலைஎழுத்துத் துறையில் நாட்டின் பல பகுதிகளில் இருந்து திறமையான மாணவர்கள் உருவாகி வருவதை வெளிப்படுத்துவதாகவும் குறிப்பிட்டார்.
பீடாதிபதி அஷ்ஷெய்க் எம்.எச்.ஏ. முனாஸ் தனது உரையில், கல்வி என்பது வெறும் அறிவை வழங்கும் அமைப்பாக மட்டுமல்லாது திறன்களையும் நற்பாங்குகளையும் உருவாக்க வேண்டியதன் அவசியத்தை வலியுறுத்தினார். பல்கலைக்கழகங்கள் பட்டதாரிகளை உருவாக்கும் நிலையங்களாக மட்டும் இல்லாமல், சமூக முன்னேற்றத்திற்கும் சமூக வளமூட்டலிற்கும் பங்களிக்க வேண்டிய பொறுப்பும் கொண்டுள்ளதாக அவர் தெரிவித்தார்.
இந்நிகழ்வு மூன்று முக்கிய அம்சங்களை உள்ளடக்கியதாக அமைந்திருந்தது என அவர் குறிப்பிட்டார். அதாவது பீடத்தின் புதிய பெயர்ப்பலகை திறப்பு நிகழ்வு, கலைஎழுத்துப் போட்டியில் வெற்றி பெற்றவர்களை கௌரவிக்கும் பரிசளிப்பு விழா மற்றும் பொதுமக்களுக்கான அறபு எழுத்தணிக் கண்காட்சி ஆகியவை ஒருங்கிணைந்த வடிவில் நடைபெற்றதாக தெரிவித்தார்.
தேசிய கல்வி மறுசீரமைப்பு தொடர்பாக நாடளாவிய ரீதியில் கலந்துரையாடல்கள் இடம்பெற்று வரும் நிலையில், மாணவர்களின் திறமைகளை மேம்படுத்தும் நுண்கலைப் பாடங்கள் மற்றும் படைப்பாற்றல் சார்ந்த செயற்பாடுகள் கல்வித் திட்டங்களில் இணைக்கப்பட வேண்டிய அவசியத்தை அவர் எடுத்துரைத்தார். அதற்கான முக்கிய தொடக்க முயற்சியாக இந்த தேசிய கலைஎழுத்துப் போட்டி அமைகின்றது என்றும் அவர் கூறினார்.
முதலில் ஏப்ரல் மாதத்தில் நடத்தத் திட்டமிடப்பட்டிருந்த இந்நிகழ்வு, அந்நேரத்தில் நிலவிய எரிபொருள் நெருக்கடி மற்றும் அரசாங்கத்தின் பயணக் கட்டுப்பாடுகள் காரணமாக பின்னர் மே மாதத்திற்கு மாற்றப்பட்டதாகவும் அவர் விளக்கமளித்தார்.
மாஹோ வலயக் கல்விப் பணிப்பாளர் ஜின்னா நளீமி அவர்கள் கலைஎழுத்துத் துறையில் கொண்டிருந்த நீண்டகால ஈடுபாட்டையும் அனுபவத்தையும் அவர் சிறப்பாக எடுத்துரைத்தார். ஜாமிஆ நளீமியாவில் கல்வி கற்ற காலத்திலிருந்தே கலைஎழுத்தில் ஆர்வம் கொண்டிருந்த அவர், பல மத்ரஸாக்கள் மற்றும் நிறுவனங்களின் பெயர்ப்பலகைகளை கையால் எழுதியிருப்பதோடு, ஜாமிஆ நளீமியாவின் சான்றிதழ்களையும் கைஎழுத்தில் தயாரித்து வருவதாகக் குறிப்பிட்டார்.
நிகழ்வை வெற்றிகரமாக முன்னெடுக்க ஏற்பாட்டுக்குழு உறுப்பினர்கள், விரிவுரையாளர்கள், மாணவர்கள், நடுவர்கள், உதவி ஊழியர்கள் மற்றும் ஆதரவளித்த நிறுவனங்கள் அனைவரும் அர்ப்பணிப்புடன் செயல்பட்டதாகவும் அவர் பாராட்டுத் தெரிவித்தார். ஒருங்கிணைப்பாளர் கலாநிதி எம்.சீ.எஸ். ஸாதிபா, செயலாளர் ஏ.ஆர்.எப்.எஸ். பர்வீன் மற்றும் அறபு மொழித் துறைத் தலைவர் கலாநிதி ஏ.எம். றாசிக் உள்ளிட்டோரின் tireless பங்களிப்பு காரணமாக நிகழ்வு வெற்றிகரமாக முன்னெடுக்கப்பட்டதாகவும் அவர் குறிப்பிட்டார்.
கௌரவ அதிதியாக உரையாற்றிய மாஹோ வலயக் கல்விப் பணிப்பாளர் ஜின்னா நளீமி, அறபு எழுத்தணிக் கலை என்பது ஆன்மீகம், கலாசாரம், அடையாளம் மற்றும் அறிவியலை ஒருங்கிணைக்கும் உயரிய இஸ்லாமியக் கலை மரபாகும் என வலியுறுத்தினார். தென்கிழக்குப் பல்கலைக்கழகத்தின் இஸ்லாமியக் கற்கைகள் மற்றும் அறபு மொழிப் பீடம் தேசிய மட்டத்தில் இத்தகைய கலை மற்றும் அறிவியல் சார்ந்த குர்ஆனிய அறபுக் கலைஎழுத்துப் போட்டியை ஏற்பாடு செய்திருப்பது, அழிந்து செல்லும் கலை பாரம்பரியத்திற்கு புத்துயிர் அளிக்கும் வரலாற்றுப் பணியாகும் எனப் பாராட்டுத் தெரிவித்தார்.
ஜாமிஆ நளீமியாவில் கல்வி கற்ற காலத்திலிருந்தே தமக்குள் அறபு எழுத்தணிக் கலையின் மீதான ஆர்வம் உருவானதாக நினைவுகூர்ந்த அவர், அந்தக் கல்வி நிலையத்தின் கலைப் பயிற்சிகளும் வழிகாட்டுதல்களும் தான் இன்று வரை தன்னை இத்துறையில் ஈடுபடச் செய்துள்ளதாகக் குறிப்பிட்டார்.
அறபு எழுத்தணிக் கலை இன்று உலகளாவிய ரீதியில் ஆய்வுப் பொருளாகவும் கலாசார அடையாளத்தின் வெளிப்பாடாகவும் மாறியுள்ளதாகக் குறிப்பிட்ட அவர், மாணவர்கள் இக்கலையை வெறும் அழகியல் நோக்கில் மட்டுமல்லாது ஆன்மீக மற்றும் கலாசார வெளிப்பாடாகவும் அணுக வேண்டும் என்றார்.
எழுத்துக்களின் நீளம், அகலம், இடைவெளி மற்றும் விகிதாசாரம் போன்றவை இணைந்து முழுமையான கலைப்படைப்பை உருவாக்குகின்றன என்பதையும், பாரம்பரிய விதிமுறைகளைப் பாதுகாத்தபடி நவீன டிஜிட்டல் உலகிற்கு ஏற்ற வகையில் அறபுக் கலைஎழுத்தை முன்னெடுக்க வேண்டிய அவசியத்தையும் அவர் வலியுறுத்தினார்.
அரபு எழுத்தணிக் கலையின் தந்தை என போற்றப்படும் அலி இப்னு முக்லா அறிமுகப்படுத்திய விகிதாசார முறைகள் இக்கலையின் அடித்தளமாக அமைந்துள்ளதாகவும், அவற்றை வலுவாகக் கற்றுக்கொள்வது அவசியம் என்றும் அவர் குறிப்பிட்டார்.
அறபுக் கலைஎழுத்து இன்று வெறும் பாரம்பரிய கலை வடிவமாக மட்டுமன்றி தொழில்முறை மற்றும் பொருளாதார வாய்ப்புகளைக் கொண்ட துறையாகவும் மாறியுள்ளது எனக் குறிப்பிட்ட அவர், டிஜிட்டல் வடிவமைப்பு, கலைத்துறை மற்றும் படைப்பாற்றல் சார்ந்த தொழில்களில் இக்கலையின் பயன்பாடு அதிகரித்து வருவதாகவும், மாணவர்கள் இதனை வாழ்வாதாரத் திறனாக கற்றுக்கொள்ள வேண்டும் என்றும் வலியுறுத்தினார்.
தனது கல்விக் காலத்தில் பொருளாதார சவால்களை எதிர்கொண்டபோது, அறபுக் கலைஎழுத்துத் திறமை தமக்கு ஆதரவாக அமைந்ததாக நினைவுகூர்ந்த அவர், ஒரு பேனாவும் மூங்கில் கலமும் கொண்டு தொடங்கிய கலை இன்று தன்னை தேசிய மேடைகளில் பேச வைத்திருப்பது அல்லாஹ்வின் அருளாகும் எனக் குறிப்பிட்டார்.
அறபு மொழித் துறைத் தலைவர் கலாநிதி ஏ.எம். றாசிக் தனது உரையில், உலகில் ஆயிரக்கணக்கான மொழிகள் காணப்பட்டாலும் அல்குர்ஆனின் மொழியான அறபு மொழி தனித்துவமான பாதுகாப்பும் நிலைத்தன்மையும் பெற்ற மொழியாக விளங்குகின்றது எனத் தெரிவித்தார். அல்குர்ஆன் மனனத்தின் மூலமும் எழுத்தின் மூலமும் பாதுகாக்கப்பட்டு வருவதாகவும், அதன் ஓசையும் எழுத்து வடிவங்களும் மனித உள்ளங்களில் ஈமானிய ஒளியையும் ஆன்மீக உணர்வையும் அதிகரிக்கின்றன என்றும் அவர் குறிப்பிட்டார்.
இந்த தேசிய அளவிலான போட்டியை நடத்தும் யோசனையை பீடாதிபதி முனாஸ் முன்வைத்ததாகவும், அதனை அறபு மொழித் துறை முழுமையாக ஏற்றுக்கொண்டு செயற்படுத்தியதாகவும் அவர் தெரிவித்தார். ஒருங்கிணைப்பாளர் கலாநிதி ஷாதிபா, செயலாளர் பர்வீன் உள்ளிட்ட விரிவுரையாளர்கள், மாணவர்கள் மற்றும் மாணவர் ஒன்றியத்தினரின் பங்களிப்புகளையும் அவர் பாராட்டினார்.
2007ஆம் ஆண்டு தென்கிழக்குப் பல்கலைக்கழகத்தின் பத்தாவது ஆண்டு நிறைவை முன்னிட்டு நடத்தப்பட்ட கரிகிராபி போட்டியை நினைவுகூர்ந்த அவர், இம்முறை அல்குர்ஆனில் உள்ள விஞ்ஞான கருத்துக்களை வெளிப்படுத்தும் வசனங்களை அடிப்படையாகக் கொண்ட “விஞ்ஞான அல்குர்ஆன் எழுத்தணிக்கலை” என்ற புதிய பரிமாணத்தில் போட்டி அமைந்துள்ளதாகத் தெரிவித்தார்.
பேராசிரியர் கலாநிதி எஸ்.எம்.எம். நபீஸ் தனது உரையில், அறபு எழுத்தணிக்கலை இலங்கையின் கல்வி வரலாற்றில் முக்கியமான இடத்தைப் பெற வேண்டிய பாரம்பரியக் கலையாகக் குறிப்பிட்டார். அழகியற் கல்வி 1893ஆம் ஆண்டு கல்வி அமைப்பில் அறிமுகப்படுத்தப்பட்டதையும், பின்னர் 1974ஆம் ஆண்டு அழகியற் கல்வி ஆய்வு நிறுவனம் உருவாக்கப்பட்டு பாடசாலை மாணவர்களுக்கு இசை, நடனம், ஓவியம் உள்ளிட்ட பல்வேறு கலைப் பாடங்கள் கற்பிக்கப்பட்டதையும் அவர் நினைவூட்டினார்.
இஸ்லாமிய விழுமியங்களுக்கு ஏற்ப இசை, நஷீத், கஸீதா, மர்ஹபா மற்றும் அஸ்மாஉல் ஹுஸ்னா போன்ற கலைப் பாடங்களை கல்வி அமைச்சு அறிமுகப்படுத்த முயற்சித்து வருவதாகவும், அதேவேளை முஸ்லிம் சமூகத்தின் ஆன்மிக அடையாளமாக விளங்கும் அறபு எழுத்தணிக்கலை இன்னும் தேசிய பாடத்திட்டத்தில் இணைக்கப்படாதிருப்பது கவலைக்குரியது என்றும் அவர் குறிப்பிட்டார்.
அறபு எழுத்தணிக்கலை அல்குர்ஆனை பாதுகாக்கும் ஒரு கலை வடிவமாகவும் அவர் வர்ணித்தார். இக்கலையை வளர்த்தெடுப்பதன் மூலம் பட்டதாரிகளுக்கு தொழில் வாய்ப்புகளையும் உருவாக்க முடியும் எனத் தெரிவித்த அவர், எதிர்காலத்தில் தேசிய பாடத்திட்டத்தில் அறபு எழுத்தணிக்கலையை இணைக்க அனைவரும் ஒத்துழைக்க வேண்டுமென அழைப்பு விடுத்தார்.
நிகழ்வில் உரையாற்றிய ஏகாஸ் அமைப்பின் உப தலைவர் ஏ.என்.எம். ஜுனைத், அறபு எழுத்தணிக் கலை என்பது ஆன்மீகம், கலாசாரம் மற்றும் அறிவியலை ஒருங்கிணைக்கும் உயரிய இஸ்லாமியக் கலை மரபாகும் எனக் குறிப்பிட்டார். மாணவர்கள் இக்கலையை வெறும் அழகியல் நோக்கில் மட்டுமல்லாது ஆன்மீக மற்றும் கலாசார வெளிப்பாடாக அணுக வேண்டும் என்றும், இக்கலை பொறுமை, நிதானம், ஒழுக்கம் மற்றும் அழகுணர்வை வளர்க்கும் என்றும் அவர் தெரிவித்தார்.
தேசிய மட்டத்தில் நடத்தப்பட்டிருந்த இப்போட்டிக்கான ஆக்கங்கள் கடந்த ஜனவரி 19 ஆம் திகதி கோரப்பட்டு, பெப்ரவரி 24 ஆம் திகதி இறுதித் திகதியாக அறிவிக்கப்பட்டிருந்தது. பாடசாலை மட்டம், அறபுக் கல்லூரி மட்டம் மற்றும் பல்கலைக்கழக மட்டம் என மூன்று பிரிவுகளின் கீழ் போட்டி நடத்தப்பட்டது.
நாடளாவிய ரீதியில் மொத்தமாக 297 ஆக்கங்கள் கிடைக்கப்பெற்றன. அவற்றில் பாடசாலை மட்டத்தில் 38 ஆக்கங்களும், அறபுக் கல்லூரி மட்டத்தில் 239 ஆக்கங்களும், பல்கலைக்கழக மட்டத்தில் 20 ஆக்கங்களும் நேரடியாகவும் தபால் மூலமாகவும் கிடைத்ததாக ஏற்பாட்டுக் குழு தெரிவித்தது.
நடுவர்களின் பக்கச்சார்பற்ற மதிப்பீட்டின் அடிப்படையில், போட்டி நிபந்தனைகளுக்கு உட்படாத 22 பாடசாலை மட்ட ஆக்கங்கள், 157 அறபுக் கல்லூரி ஆக்கங்கள் மற்றும் 12 பல்கலைக்கழக ஆக்கங்கள் நிராகரிக்கப்பட்டன. தெரிவுசெய்யப்பட்ட 16 பாடசாலை மட்ட ஆக்கங்களில் முதல் மூன்று இடங்களைப் பெற்றவர்களுக்கு பணப்பரிசுகள் வழங்கப்பட்டதுடன், தெரிவுசெய்யப்பட்ட 82 அறபுக் கல்லூரி ஆக்கங்களில் முதல் மூன்று இடங்கள் அறிவிக்கப்பட்டன. பல்கலைக்கழக மட்டத்தில் தெரிவான 8 ஆக்கங்களில் ஒன்றே மூன்றாம் இடத்தைப் பெற்றிருந்தது குறிப்பிடத்தக்கது.
இந்நிகழ்வின் போது வெற்றியாளர்களுக்கான பணப்பரிசுகள், சான்றிதழ்கள் மற்றும் தெரிவுசெய்யப்பட்ட போட்டியாளர்களுக்கான தகைமைச் சான்றிதழ்களும் வழங்கப்பட்டன. தொடர்ந்து பிற்பகல் 1.30 மணி முதல் இரவு 8.00 மணி வரை அறபு எழுத்தணிக் கண்காட்சியும் நடைபெற்றது. இக்கண்காட்சியில் போட்டியில் கலந்துகொண்டவர்களின் படைப்புகள் காட்சிப்படுத்தப்பட்டதுடன், பல்வேறு சுவாரஸ்ய அம்சங்களும் இடம்பெற்றிருந்தன.
நிகழ்வின் நிறைவில் செயலாளர் ஏ.ஆர்.எப்.எஸ். பர்வீன் நன்றியுரையாற்றினார். மேலும், இந்நிகழ்வை வெற்றிகரமாக முன்னெடுக்க பீட விரிவுரையாளர்கள், உதவி விரிவுரையாளர்கள், மாணவர்கள் மற்றும் ஊழியர்கள் அனைவரும் அர்ப்பணிப்புடன் செயற்பட்டிருந்தமை குறிப்பிடத்தக்கது.
0 comments :
Post a Comment