திங்கட்கிழமை வெளியிட்ட அறிக்கையில் சவுதி வெளிநாட்டு அலுவல்கள் அமைச்சகம், ஈரான் இந்த தாக்குதல்களை தொடர்ந்து மேற்கொண்டால் அது தூதரக, பொருளாதார மற்றும் பாதுகாப்பு ரீதியாக கடுமையான விளைவுகளை சந்திக்க வேண்டிய நிலை ஏற்படும் என்று தெரிவித்துள்ளது. மேலும், இந்த நிலை தொடர்ந்தால் “இந்த மோதலில் மிகப்பெரிய இழப்பாளியாக மாறுவது ஈரானே” என்றும் அந்த அறிக்கையில் வலியுறுத்தப்பட்டுள்ளது.
சிவில் விமான நிலையங்கள் மற்றும் எண்ணெய் உற்பத்தி நிலையங்களை குறிவைத்து தாக்குதல் நடத்துவது, பிராந்தியத்தின் பாதுகாப்பு மற்றும் நிலைத்தன்மையை அச்சுறுத்தும் முயற்சி என்றும், இது சர்வதேச சட்டங்களையும் உடன்படிக்கைகளையும் வெளிப்படையாக மீறும் செயல் என்றும் சவுதி தெரிவித்துள்ளது.
அதேவேளை, சவுதி நிலப்பரப்பிலிருந்து போர் விமானங்கள் புறப்பட்டு ஈரானை தாக்க அனுமதி அளிக்கப்பட்டதாக ஈரான் முன்வைத்த குற்றச்சாட்டையும் சவுதி மறுத்துள்ளது. அந்த விமானங்கள் சவுதி மற்றும் வளைகுடா ஒத்துழைப்பு கவுன்சில் (GCC) நாடுகளின் வான்வெளியை பாதுகாக்கும் நோக்கத்துடன் கண்காணிப்பு பறப்புகளை மேற்கொண்டு வருவதாக அமைச்சகம் விளக்கியுள்ளது.
இந்த தாக்குதல்களின் தொடர்ச்சியாக, சவுதி அரேபியாவின் தென்கிழக்கில் உள்ள ஷெய்பா எண்ணெய் களத்தை குறிவைத்து ஏவப்பட்ட இரண்டு கட்ட ட்ரோன் தாக்குதல்களை சவுதி வான்வழி பாதுகாப்பு அமைப்புகள் தடுத்துத் தகர்த்துள்ளதாக தெரிவிக்கப்பட்டுள்ளது.
ஐக்கிய அரபு எமிரேட்ஸ் (UAE) மீது மேற்கொள்ளப்பட்ட தாக்குதல்களில் 15 பாலிஸ்டிக் ஏவுகணைகள் கண்டறியப்பட்டதாகவும், அவற்றில் 12 ஏவுகணைகள் வான்வழி பாதுகாப்பு அமைப்புகள் மூலம் அழிக்கப்பட்டதாகவும் அதிகாரிகள் தெரிவித்துள்ளனர். மேலும் மூன்று ஏவுகணைகள் கடலில் விழுந்ததாக கூறப்பட்டுள்ளது. அதேபோல், 18 ட்ரோன்களில் 17 ட்ரோன்கள் தடுக்கப்பட்டதாகவும், அபுதாபி மேல் வான்வெளியில் தடுக்கப்பட்ட ஏவுகணைகளின் துண்டுகள் விழுந்ததில் இருவர் காயமடைந்ததாகவும் தகவல்கள் வெளியாகியுள்ளன.
இதற்கிடையில், தொழில்நுட்ப கோளாறால் ஒரு இராணுவ ஹெலிகாப்டர் விபத்துக்குள்ளானதில் இரு எமிரேட்டி இராணுவ வீரர்கள் உயிரிழந்ததாக ஐக்கிய அரபு எமிரேட்ஸ் பாதுகாப்பு அமைச்சகம் தெரிவித்துள்ளது.
ஈரானின் தாக்குதல்கள் குவைத், கட்டார் மற்றும் பஹ்ரைன் போன்ற வளைகுடா நாடுகளையும் தாக்கியுள்ளதாக தகவல்கள் தெரிவிக்கின்றன. பஹ்ரைனில் குடியிருப்பு பகுதி ஒன்று தாக்கப்பட்டதில் குழந்தைகள் உட்பட 32 பேர் காயமடைந்துள்ளனர். மேலும் அந்த நாட்டின் ஒரே எண்ணெய் சுத்திகரிப்பு நிலையத்தில் தாக்குதல் காரணமாக தீப்பரவல் ஏற்பட்டதாகவும், அதனால் கரும்புகை வானில் பரவியதாகவும் தகவல்கள் தெரிவிக்கின்றன.
துருக்கியின் வான்வெளிக்குள் நுழைந்த ஒரு பாலிஸ்டிக் ஏவுகணையை நாட்டு பாதுகாப்பு அமைப்புகள் தடுத்துள்ளதாகவும், போர் தொடங்கியதிலிருந்து இது இரண்டாவது சம்பவமாகும் என்றும் தெரிவிக்கப்பட்டுள்ளது.
இஸ்ரேலில் பல இடங்களில் ஏவுகணை எச்சரிக்கை சைரன்கள் தொடர்ந்து ஒலித்த நிலையில், மத்திய இஸ்ரேலில் நிகழ்ந்த ஏவுகணை தாக்குதலில் ஒருவர் உயிரிழந்ததுடன் ஒரு பெண் காயமடைந்ததாகவும் கூறப்படுகிறது. கடந்த ஒரு வாரத்தில் இஸ்ரேலில் பதிவான முதல் உயிரிழப்பு இதுவாகும்.
இதற்கு பதிலடி நடவடிக்கையாக இஸ்ரேல், ஈரானின் இஸ்பஹான் நகரில் உள்ள ரெவல்யூஷனரி கார்ட்ஸ் கட்டளை மையங்கள், பசீஜ் தன்னார்வப் பாதுகாப்புப் படை நிலையங்கள், ஏவுகணை இயந்திர உற்பத்தி நிலையம் மற்றும் ஏவுகணை ஏவுதளங்களை குறிவைத்து தாக்குதல் நடத்தியதாக தகவல்கள் வெளியாகியுள்ளன.
இதேவேளை, ஈராகின் தலைநகர் பக்தாத் விமான நிலையத்திற்குள் உள்ள அமெரிக்க இராணுவ முகாமை குறிவைத்து பறந்த ட்ரோன் ஒன்றை ஈராக் பாதுகாப்பு அமைப்புகள் சுட்டு வீழ்த்தியுள்ளன.
இந்த போரில் மார்ச் 1 அன்று சவுதி அரேபியாவில் நடந்த ஈரான் தாக்குதலில் காயமடைந்த அமெரிக்க இராணுவ வீரர் ஒருவர் உயிரிழந்ததாக அமெரிக்க இராணுவம் தெரிவித்துள்ளது. இதனால் இந்த போரில் உயிரிழந்த அமெரிக்க வீரர்களின் எண்ணிக்கை ஏழாக உயர்ந்துள்ளது.
இந்நிலையில், போரின் ஆரம்பத்திலிருந்து இதுவரை ஈரானில் குறைந்தது 1,230 பேர் உயிரிழந்துள்ளதாகவும், இஸ்ரேலில் 11 பேர் உயிரிழந்துள்ளதாகவும் சர்வதேச தகவல்கள் தெரிவிக்கின்றன.
மத்திய கிழக்கு பிராந்தியத்தில் அதிகரித்து வரும் இந்த இராணுவ மோதல்கள், உலகளாவிய அரசியல் மற்றும் பொருளாதார சூழ்நிலைகளில் மேலும் பதற்றத்தை ஏற்படுத்தக்கூடும் என சர்வதேச பார்வையாளர்கள் எச்சரித்து வருகின்றனர்.
0 comments :
Post a Comment