கிராமிய பாலங்கள் அபிவிருத்தி வேலைத்திட்டத்தின் கள நிலவரங்களை ஆய்வு செய்வதற்காக பொது நிர்வாகம், மாகாண சபைகள் மற்றும் உள்ளூராட்சி அமைச்சின் திட்ட பணிப்பாளர் மற்றும் திட்ட பொறியாளர்கள் அடங்கிய குழுவினர் சம்மாந்துறைக்கு விஜயம் மேற்கொண்டனர். இவ்விஜயத்தின் போது, சம்மாந்துறை பிரதேச சபை தவிசாளர் ஐ.எல்.எம். மாஹிர் அவர்களும் குறித்த குழுவினருடன் இணைந்து நேரடி களப் பார்வையில் ஈடுபட்டார்.
இதன்போது, சிறிய பாலங்கள் உள்ளிட்ட பல்வேறு கிராமிய அபிவிருத்தி திட்டங்களின் முன்னேற்ற நிலை தொடர்பாக விரிவான ஆய்வு மேற்கொள்ளப்பட்டது. மக்கள் பயன்பாட்டை மேம்படுத்தும் நோக்கில் நடைமுறைப்படுத்தப்பட்டு வரும் பணிகளின் தரம், காலக்கெடு மற்றும் பயன்பாட்டு திறன் போன்ற அம்சங்கள் குறித்து அதிகாரிகள் கவனம் செலுத்தினர்.
மேலும், திட்டங்கள் துரிதமாகவும் தரமான முறையிலும் நிறைவேற்றப்பட வேண்டியதன் அவசியம் தொடர்பாகவும் கலந்துரையாடப்பட்டது.
இந்த நிகழ்வில், சம்மாந்துறை பிரதேச சபை செயலாளர் யூ.எல். அப்துல் மஜீட், தொழில்நுட்ப உத்தியோகத்தர் எம்.எம்.எம். முஸ்தபா உள்ளிட்ட அதிகாரிகளும் கலந்து கொண்டனர். கிராமிய மக்களின் போக்குவரத்து வசதிகளை மேம்படுத்தும் நோக்கில் மேற்கொள்ளப்படும் இத்திட்டங்கள் விரைவில் பயனளிக்கும் என எதிர்பார்க்கப்படுகிறது.
0 comments :
Post a Comment