வதிவிடத்தை உறுதி செய்வதற்காக கிராம சேவை உத்தியோகத்தரினால் வழங்கப்படும் சான்றிதழ் பிரதேச செயலாளரினால் உறுதி செய்யப்படுவது அவசியம் அல்ல என்று, அரச நிர்வாகம் மற்றும் உள்நாட்டு அலுவல்கள் அமைச்சு அறிவித்துள்ளது.
இது தொடர்பில் அமைச்சு சுற்றறிக்கை ஒன்றையும் வெளியிட்டுள்ளது. கிராம சேவை உத்தியோகத்தர்களால் வழங்கப்படும் வதிவிட மற்றும் நற்சான்றுப் பத்திரங்களுக்கு, பெப்ரவரி மாதம் 10 ஆம் திகதிக்குப் பின்னர் பிரதேச செயலாளரின் கையொப்பம் தேவைப்படாதென அந்த சுற்றறிக்கையில் குறிப்பிடப்பட்டுள்ளது.
பிரதேச செயலாளர்களின் கையொப்பத்தைப் பெறுவதற்காகச் செல்லும் போது, மக்கள் எதிர்கொள்ளும் பிரச்சினைகளைக் கருத்திற் கொண்டு அரசாங்கம் இந்தத் தீர்மானத்தை மேற்கொண்டுள்ளது.
பிரதேச செயலகத்தினால் கிராம சேவை உத்தியோகத்தர், வதிவிடச் சான்றிதழ் புத்தகம் மற்றும் நற்சான்றிதழ் புத்தகத்தின் மூலம் இந்தச் சான்றிதழ்கள் கிராம சேவை உத்தியோகத்தரினால் முத்திரையிடப்படுவது மாத்திரம் போதுமானதென அந்த சுற்றறிக்கையில் மேலும் தெரிவிக்கப்பட்டுள்ளது.
பிரதேச செயலாளர் பிரிவின் பெயர் மற்றும் கிராம சேவை உத்தியோகத்தர் பிரிவின் பெயர் உள்ளடக்கிய உத்தியோகபூர்வ முத்திரை ஒன்று தயாரித்து வைத்திருக்க வேண்டும். இது தயாரிக்கப்படாத பட்சத்தில் தற்பொழுது பயன்படுத்தப்படும் உத்தியோகபூர்வ முத்திரையைப் பயன்படுத்த முடியும் என்றும் அந்த சுற்றறிக்கையில் மேலும் தெரிவிக்கப்பட்டுள்ளது.
