பல்கலைக்கழக மாணவர்களின் உயர்கல்வி வளர்ச்சிக்கும், பொருளாதார நெருக்கடிகளை எதிர்கொள்ளும் நலிந்த ஊடகவியலாளர்களின் வாழ்வாதாரத்திற்கும் தொடர்ச்சியாகப் பங்களித்து வரும் ஹாஷிம் உமர் பவுண்டேஷன், தனது சமூக மற்றும் கல்விசார் பணிகளில் மற்றுமொரு முக்கிய மைல்கல்லை எட்டியுள்ளது.
ஹாஷிம் உமர் பவுண்டேஷனினால் பல்கலைக்கழக மாணவர்களுக்கு இலவசமாக மடிக்கணினிகள் வழங்கும் வேலைத்திட்டத்தின் 27ஆம் கட்ட நிகழ்வும், 135ஆவது மடிக்கணினி வழங்கும் நிகழ்வும் 2026 நவம்பர் 14ஆம் திகதி சனிக்கிழமை பிற்பகல் 3.00 மணிக்கு கொழும்பு கொள்ளுப்பிட்டியிலுள்ள பவுண்டேஷனின் தலைமையகத்தில் சிறப்பாக நடைபெற்றது.
அமைப்பின் ஸ்தாபகரும் தலைவருமான புரவலர் ஹாஷிம் உமர் அவர்களின் தலைமையில் நடைபெற்ற இந்நிகழ்வில், வீரகேசரி பத்திரிகையின் ஆசிரியர் திரு. ஸ்ரீ கஜன், தினகரன் பத்திரிகையின் முகாமையாளர் திரு. யஸீர் மும்தாஸ் உள்ளிட்ட ஊடகத்துறைப் பிரமுகர்கள் கலந்து சிறப்பித்தனர்.
ஐந்து பல்கலைக்கழக மாணவர்களுக்கு மடிக்கணினிகள்
நாட்டின் நாலாபாகங்களிலிருந்தும் தெரிவு செய்யப்பட்ட ஐந்து பல்கலைக்கழக மாணவர்களுக்கு இந்நிகழ்வில் இலவச மடிக்கணினிகள் வழங்கி வைக்கப்பட்டன.
பல்கலைக்கழகக் கல்வியைத் தொடர்வதில் பொருளாதார வசதியின்மை காரணமாக நவீன தொழில்நுட்ப வசதிகளைப் பெற்றுக்கொள்ள முடியாத மாணவர்களுக்கு உதவும் நோக்கில் முன்னெடுக்கப்படும் இத்திட்டம், மாணவர்களின் கல்வி மற்றும் ஆய்வுச் செயற்பாடுகளுக்கு பெரும் உறுதுணையாக அமைந்து வருகின்றது.
குறிப்பாக, டிஜிட்டல் கல்வி, இணையவழிக் கற்றல், ஆய்வுப் பணிகள் மற்றும் தகவல் தொழில்நுட்பப் பயன்பாடு ஆகியவற்றில் மாணவர்கள் முன்னேறுவதற்கு இவ்வாறான உதவிகள் முக்கிய பங்களிப்பை வழங்குகின்றன.
இதுவரை இத்திட்டத்தின் ஊடாக 135 மடிக்கணினிகள் வழங்கப்பட்டுள்ளமை, ஹாஷிம் உமர் பவுண்டேஷனின் தொடர்ச்சியான கல்விசார் சமூகப் பணிக்குச் சிறந்த சான்றாக அமைந்துள்ளது.
நலிந்த ஊடகவியலாளர்களுக்கு தலா ஒரு இலட்சம் ரூபா நிதியுதவி
மாணவர்களின் கல்வி வளர்ச்சிக்கு உதவுவதுடன், ஊடகத்துறையில் பணியாற்றி பொருளாதார ரீதியாகப் பாதிக்கப்பட்டுள்ள நலிந்த ஊடகவியலாளர்களின் நலனிலும் பவுண்டேஷன் விசேட கவனம் செலுத்தியுள்ளது.
இதன் ஒரு பகுதியாக, தெரிவு செய்யப்பட்ட இரண்டு நலிந்த ஊடகவியலாளர்களுக்கு தலா 100,000 ரூபா வீதம் மொத்தம் 200,000 ரூபா நிதியுதவி இந்நிகழ்வில் வழங்கி வைக்கப்பட்டது.
கல்வி மற்றும் ஊடகத்துறை ஆகிய இரு முக்கிய துறைகளையும் மையப்படுத்தி ஒரே நிகழ்வில் முன்னெடுக்கப்பட்ட இத்தகைய உதவித் திட்டம், அமைப்பின் சமூகப் பொறுப்புணர்வையும் மனிதநேய நோக்கையும் வெளிப்படுத்துவதாக அமைந்தது.
நூல் வழங்கி கௌரவிப்பு
இதன்போது, சமூகசேவைகளின் வரைவிலக்கணம் எனும் நூல் ஹாஷிம் உமர் பவுண்டேஷனின் தலைவரும் ஸ்தாபகருமான புரவலர் ஹாஷிம் உமர் அவர்களால் வழங்கி வைக்கப்பட்டது.
பல்துறைப் பிரமுகர்களின் பங்கேற்பு
இந்நிகழ்வில் ஹாஷிம் உமர் பவுண்டேஷனின் பணிப்பாளர் திருமதி மரியம் ஹாஷிம் உமர், தமிழன் பத்திரிகையின் இணை ஆசிரியர் ஏ.எம். ஜௌபர், சுயாதீன தொலைக்காட்சி நிறுவனத்தின் தமிழ் செய்திப் பிரிவின் முன்னாள் செய்தி முகாமையாளர் சித்தீக் ஹனீபா, சுகாதார மற்றும் வெகுஜன ஊடக அமைச்சின் ஊடக கண்காணிப்பு அதிகாரி திருமதி ஜிப்ரியா இப்றாஹீம் ஆகியோர் கலந்து கொண்டனர்.
மேலும், SS Bridal Beauty Center & Academy (Pvt) Ltd நிறுவனத்தின் பிரதம நிறைவேற்று அதிகாரி (CEO) டாக்டர் M.F.F. சஸ்னா சபான், Ceylon Secret நிறுவனத்தின் பணிப்பாளர் பஸ்னா, சிரேஷ்ட ஊடகவியலாளர் ராதா மேத்தா, சந்திரிகா நிரோசன், இணைப்பாளர்களான திருமதி ரிகாஸா, ஆகிப் மொஹமட், இஸ்ரத், படப்பிடிப்பாளர் ஹிஷாம் மற்றும் மாணவர்களின் பெற்றோர்கள் உள்ளிட்ட பலரும் கலந்து கொண்டனர்.
தொடரும் மனிதநேயப் பயணம்
இன்றைய டிஜிட்டல் உலகில் உயர்கல்வியைத் தொடர்வதற்கு மடிக்கணினி என்பது மாணவர்களுக்கு ஓர் அத்தியாவசியக் கற்றல் கருவியாக மாறியுள்ளது. குறிப்பாக, பொருளாதார வசதிகள் குறைந்த குடும்பங்களைச் சேர்ந்த மாணவர்களுக்கு இத்தகைய உதவிகள் கல்வியில் சமவாய்ப்பை ஏற்படுத்துவதுடன், அவர்களின் எதிர்கால இலக்குகளை அடைவதற்கும் வழிவகுக்கின்றன.
அதேவேளை, ஊடகத்துறையில் அர்ப்பணிப்புடன் பணியாற்றிய நலிந்த ஊடகவியலாளர்களுக்கு நிதியுதவி வழங்குவதன் மூலம் அவர்களின் சமூகப் பங்களிப்பையும் வாழ்வாதாரத் தேவைகளையும் மதித்து ஆதரிக்கும் பணியையும் பவுண்டேஷன் முன்னெடுத்துள்ளது.
அந்த வகையில், 27ஆம் கட்டத்தில் 135ஆவது மடிக்கணினியை வழங்கியுள்ளதுடன், பல்கலைக்கழக மாணவர்களின் கல்வி முன்னேற்றத்திற்கும் நலிந்த ஊடகவியலாளர்களின் நலனுக்கும் ஒருசேரக் கைகொடுக்கும் ஹாஷிம் உமர் பவுண்டேஷனின் இம்முயற்சி சமூகத்தின் பல்வேறு தரப்பினரதும் பாராட்டைப் பெற்றுள்ளது.
கல்விக்கு உதவுதல், ஊடகவியலாளர்களைக் கௌரவித்தல், சமூகத்தில் நலிவடைந்தவர்களுக்கு ஆதரவளித்தல் என்ற உயரிய நோக்குடன் புரவலர் ஹாஷிம் உமர் தலைமையில் முன்னெடுக்கப்படும் இப்பணிகள் சமூக மேம்பாட்டுக்கான அர்த்தமுள்ள மனிதநேயப் பயணமாகத் தொடர்கின்றன.
0 comments :
Post a Comment