தனிநபர் வருமான வரி விலக்கு எல்லை ரூ.162,500 ஆக அதிகரிப்பு – கல்வி, சுகாதாரம், போக்குவரத்து, விவசாயம் மற்றும் டிஜிட்டல் பொருளாதாரத்திற்கு முக்கியத்துவம்!
இலங்கையின் பொருளாதாரத்தை ஸ்திரப்படுத்துவதிலிருந்து பொருளாதார விரிவாக்கம் மற்றும் மாற்றமிக்க அபிவிருத்தியை நோக்கி நகர்த்தும் இலக்குடன், 2027ஆம் ஆண்டுக்கான வரவு செலவுத்திட்டத்தை ஜனாதிபதியும் நிதி அமைச்சருமான அநுர குமார திசாநாயக்க இன்று (12) பாராளுமன்றத்தில் சமர்ப்பித்தார்.
தேசிய மக்கள் சக்தி அரசாங்கத்தின் மூன்றாவது வரவு செலவுத்திட்டமான இதில், அரச ஊழியர்களின் சம்பள அதிகரிப்பு, பல்வேறு அரச துறை உத்தியோகத்தர்களுக்கான கொடுப்பனவுகள் உயர்வு, ஓய்வூதியதாரர்களுக்கான நிவாரணம், தனிநபர் வருமான வரி மறுசீரமைப்பு, கல்வி மற்றும் சுகாதாரத் துறைகளின் மேம்பாடு, உட்கட்டமைப்பு அபிவிருத்தி, விவசாயம், சுற்றுலாத்துறை மற்றும் டிஜிட்டல் பொருளாதார வளர்ச்சி உள்ளிட்ட பல்வேறு முக்கிய முன்மொழிவுகள் இடம்பெற்றுள்ளன.
அரச ஊழியர்களுக்கு முக்கியத்துவம் – சம்பள அதிகரிப்புக்கு ரூ.110 பில்லியன்
2027ஆம் ஆண்டுக்கான வரவு செலவுத்திட்டத்தில் அரச ஊழியர்களின் சம்பள விடயத்திற்கு விசேட கவனம் செலுத்தப்பட்டுள்ளது.
2025ஆம் ஆண்டு அறிமுகப்படுத்தப்பட்ட அரச ஊழியர்களின் சம்பள அதிகரிப்பின் இறுதிக்கட்டத்தை நடைமுறைப்படுத்துவதற்காக 110 பில்லியன் ரூபா ஒதுக்கீடு செய்யப்படுவதாக ஜனாதிபதி அறிவித்துள்ளார்.
அத்துடன், பல்வேறு அரச துறை ஊழியர்களின் விசேட கொடுப்பனவுகளையும் அதிகரிப்பதற்கு முன்மொழியப்பட்டுள்ளது.
அதன்படி,
மருத்துவ அதிகாரிகள்: மாதாந்தம் வழங்கப்படும் இடையூறு, கிடைப்புநிலை மற்றும் போக்குவரத்துக் கொடுப்பனவு (DAT) 70,000 ரூபாவிலிருந்து 95,000 ரூபாவாக அதிகரிக்கப்படும்.
தாதியர்கள் மற்றும் துணை மருத்துவப் பணியாளர்கள்: மாதாந்த விசேட கடமைக்கான கொடுப்பனவு 6,000 ரூபாவிலிருந்து 12,000 ரூபாவாக இரட்டிப்பாக்கப்படும்.
ஏனைய சுகாதாரப் பணியாளர்கள்: விசேட கொடுப்பனவு 2,000 ரூபாவிலிருந்து 4,000 ரூபாவாக அதிகரிக்கப்படும்.
பல்கலைக்கழக விரிவுரையாளர்கள்: மாதாந்த கல்விசார் கொடுப்பனவு 25,000 ரூபாவால் அதிகரிக்கப்படும்.
வெளிவாரி பல்கலைக்கழக விரிவுரையாளர்கள்: ஒரு மணித்தியாலத்திற்கான கொடுப்பனவு 1,500 ரூபாவிலிருந்து 4,500 ரூபாவாக மூன்று மடங்கு அதிகரிக்கப்படும்.
பொலிஸ் உத்தியோகத்தர்கள்: மாதாந்த உணவு மற்றும் தங்குமிடக் கொடுப்பனவு 10,000 ரூபாவால் அதிகரிக்கப்படும்.
சிறைச்சாலை உத்தியோகத்தர்கள்: ஆபத்துக்கான கொடுப்பனவு 8,000 ரூபாவிலிருந்து 16,000 ரூபாவாக இரட்டிப்பாக்கப்படும்.
கிராம உத்தியோகத்தர்கள்: மாதாந்த போக்குவரத்துக் கொடுப்பனவு 1,600 ரூபாவிலிருந்து 4,000 ரூபாவாக அதிகரிக்கப்படும்.
நிர்வாக சேவை உள்ளிட்ட தகுதியுடைய நிறைவேற்று அதிகாரிகள்: உத்தியோகபூர்வ வாகனத்திற்குப் பதிலாக தனிப்பட்ட வாகனத்தைப் பயன்படுத்துவோருக்கான போக்குவரத்துக் கொடுப்பனவு 50,000 ரூபாவிலிருந்து 100,000 ரூபாவாக அதிகரிக்கப்படும்.
முப்படையினர்: தினசரி உணவுக் கொடுப்பனவு அதிகரிக்கப்படும்.
மருத்துவ அதிகாரிகள், தாதியர்கள் மற்றும் துணை மருத்துவப் பணியாளர்களுக்கான சில கொடுப்பனவு அதிகரிப்புகள் இரண்டு கட்டங்களாக நடைமுறைப்படுத்தப்படவுள்ளன. முதலாவது கட்டம் 2027 ஜூலை மாதத்திலும், எஞ்சிய அதிகரிப்பு 2028ஆம் ஆண்டிலும் வழங்கப்படும் என அறிவிக்கப்பட்டுள்ளது.
ஏனைய சில கொடுப்பனவு அதிகரிப்புகள் 2027 ஏப்ரல் மற்றும் ஜூலை மாதங்களில் நடைமுறைக்கு வரவுள்ளன.
மேலும், 2020 முதல் 2024 வரையான காலப்பகுதியில் ஓய்வுபெற்ற ஓய்வூதியதாரர்களுக்கு மாதாந்தம் 2,500 ரூபா மேலதிக இடைக்காலக் கொடுப்பனவு வழங்கவும் முன்மொழியப்பட்டுள்ளது.
தனிநபர் வருமான வரி விலக்கு எல்லை அதிகரிப்பு
சம்பளம் பெறும் ஊழியர்களுக்கு மற்றுமொரு முக்கிய நிவாரணமாக தனிநபர் வருமான வரி விலக்கு எல்லையை அதிகரிப்பதற்கு முன்மொழியப்பட்டுள்ளது.
தற்போது மாதாந்தம் 150,000 ரூபாவாக உள்ள வருமான வரி விலக்கு எல்லையை 162,500 ரூபாவாக அதிகரிக்கவும், வருடாந்த வரி விலக்கு எல்லையை 1.8 மில்லியன் ரூபாவிலிருந்து 1.95 மில்லியன் ரூபாவாக உயர்த்தவும் முன்மொழியப்பட்டுள்ளது.
இதன்படி, மாதாந்தம் 162,500 ரூபா வரையான சம்பளம் மற்றும் கொடுப்பனவுகளைப் பெறுவோருக்கு தனிநபர் வருமான வரி விதிக்கப்படாத வகையில் புதிய திருத்தம் அமையும்.
அத்துடன், வருமான வரி வீதங்களிலும் மாற்றங்கள் முன்மொழியப்பட்டுள்ளன. 6, 12, 18, 24, 30 மற்றும் 36 சதவீத வரி வீதங்களின் அடிப்படையில் வருமான வரி படிநிலைகள் மறுசீரமைக்கப்படவுள்ளன.
இந்த மாற்றங்களின் மூலம் வருமானத்தைப் பொறுத்து மாதாந்தம் 750 ரூபா முதல் 15,750 ரூபா வரையான மேலதிக வரி நிவாரணம் கிடைக்குமென அறிவிக்கப்பட்டுள்ளது.
கல்வித்துறைக்கு புதிய முதலீடுகள்
கல்வித்துறையின் தரத்தை உயர்த்துவதற்கும் மாணவர்களுக்கு நவீன தொழில்நுட்ப வசதிகளை வழங்குவதற்கும் பல்வேறு முன்மொழிவுகள் முன்வைக்கப்பட்டுள்ளன.
தரம் 2 மற்றும் தரம் 6 மாணவர்களுக்கான கல்வி மறுசீரமைப்புகள் அடுத்த வருடம் நடைமுறைப்படுத்தப்படவுள்ளன.
நாடு முழுவதும் தெரிவுசெய்யப்பட்ட 750,000 மாணவர்களுக்கு அகலப்பட்டை இணைய வசதிகளை வழங்கவும் திட்டமிடப்பட்டுள்ளது.
தனியார் பல்கலைக்கழகங்களில் உயர்கல்வியைத் தொடரும் மாணவர்களுக்கான வட்டியில்லாக் கடன் திட்டத்தின் கீழ் தற்போது வழங்கப்படும் மாதாந்தக் கொடுப்பனவை 6,250 ரூபாவிலிருந்து 10,000 ரூபாவாக 2027 ஏப்ரல் முதல் அதிகரிக்கவும் முன்மொழியப்பட்டுள்ளது.
தேசிய கல்வி நிறுவகத்தில் ஆசிரியர் பயிற்சியைப் பெறும் பயிலுநர்களுக்கான மாதாந்தக் கொடுப்பனவு 10,500 ரூபாவிலிருந்து 20,000 ரூபாவாக அதிகரிக்கப்படும்.
பல்கலைக்கழகங்களில் டிஜிட்டல் வசதிகளை மேம்படுத்துதல், ஆராய்ச்சி மற்றும் புத்தாக்கச் செயற்பாடுகளை ஊக்குவித்தல் உள்ளிட்ட விடயங்களுக்கும் முக்கியத்துவம் வழங்கப்பட்டுள்ளது.
சூறாவளி டிட்வா காரணமாகப் பாதிக்கப்பட்ட பல்கலைக்கழகங்களைப் புனரமைப்பதற்காக 750 மில்லியன் ரூபா மேலதிகமாக ஒதுக்கப்பட்டுள்ளது. இதில் பேராதனைப் பல்கலைக்கழகமும் உள்ளடங்குகிறது.
சுகாதாரத்துறைக்கு புதிய ஒதுக்கீடுகள்
சுகாதார சேவைகளை வலுப்படுத்துவதற்கும் மருத்துவ வசதிகளை மேம்படுத்துவதற்கும் பல்வேறு திட்டங்கள் முன்மொழியப்பட்டுள்ளன.
20 வருடங்களுக்கு மேல் பழமையான நோயாளர் காவு வண்டிகளை மாற்றுவதற்காக 3 பில்லியன் ரூபா ஒதுக்கீடு செய்யப்பட்டுள்ளது.
இதன் கீழ் 2027ஆம் ஆண்டில் 100 புதிய நோயாளர் காவு வண்டிகளை இந்தியாவின் உதவியுடன் சுகாதார சேவையில் இணைக்கவும் திட்டமிடப்பட்டுள்ளது.
மேலும், டெங்கு ஒழிப்பு நடவடிக்கைகளை விரிவுபடுத்துவதற்காக 400 மில்லியன் ரூபாவும், சிறுவர்களின் பார்வைக் குறைபாடுகளைத் தீர்ப்பதற்காக இலவச மூக்குக் கண்ணாடிகளை வழங்க 100 மில்லியன் ரூபாவும் ஒதுக்க முன்மொழியப்பட்டுள்ளது.
சமூக நலன்புரித் திட்டங்களுக்கு ரூ.230 பில்லியன்
வறிய மற்றும் மிகவும் வறிய குடும்பங்களுக்கான சமூகப் பாதுகாப்புத் திட்டங்களைத் தொடர்ந்து முன்னெடுப்பதற்காக 2027ஆம் ஆண்டில் 230 பில்லியன் ரூபா ஒதுக்கீடு செய்யப்பட்டுள்ளது.
அஸ்வெசும உள்ளிட்ட நலன்புரித் திட்டங்கள் இதன் கீழ் தொடரவுள்ளன.
மாற்றுத்திறனாளிகளுக்கான மாதாந்தக் கொடுப்பனவை 10,000 ரூபாவிலிருந்து 12,500 ரூபாவாகவும், சிறுநீரக நோயாளிகளுக்கான கொடுப்பனவை 10,000 ரூபாவிலிருந்து 12,500 ரூபாவாகவும் அதிகரிக்க முன்மொழியப்பட்டுள்ளது.
பெண்கள் தலைமைத்துவம் வகிக்கும் குடும்பங்களுக்கு உதவுவதற்காக 12.5 பில்லியன் ரூபா நிதியொதுக்கீட்டில் சலுகை வட்டிக் கடன் திட்டமொன்றும் அறிமுகப்படுத்தப்படவுள்ளது.
இதன் கீழ் சமுர்த்தி வங்கிகள் ஊடாக 3 சதவீத வருடாந்த வட்டியில் ஒரு மில்லியன் ரூபா வரையான கடன்களைப் பெற்றுக்கொள்ள முடியும்.
வீடமைப்பு மற்றும் மீள்குடியேற்றம்
குறைந்த வருமானம் பெறும் குடும்பங்களுக்காக 'தனக்கென ஒரு இடம் – அழகான வாழ்க்கை' என்ற திட்டத்தின் கீழ் 70,000 வீடுகளை நிர்மாணிக்கத் திட்டமிடப்பட்டுள்ளது.
2027ஆம் ஆண்டில் 10,000 புதிய வீடுகளை நிர்மாணிப்பதற்காக 15 பில்லியன் ரூபா ஒதுக்கீடு செய்ய முன்மொழியப்பட்டுள்ளது.
ஒரு வீட்டுக்கான அரசாங்க உதவித்தொகை ஒரு மில்லியன் ரூபாவிலிருந்து 1.5 மில்லியன் ரூபாவாக அதிகரிக்கப்படும்.
வடக்கு மற்றும் கிழக்கு மாகாணங்களில் யுத்தத்தால் இடம்பெயர்ந்த நிலையில் இன்னமும் மீள்குடியேற்றப்படாத சுமார் 13,000 குடும்பங்களை அடுத்த இரண்டு வருடங்களுக்குள் மீள்குடியேற்றவும் அரசாங்கம் திட்டமிட்டுள்ளது. இதற்காக ஏற்கனவே ஒதுக்கப்பட்ட 6 பில்லியன் ரூபாவுக்கு மேலதிகமாக 4 பில்லியன் ரூபா ஒதுக்க முன்மொழியப்பட்டுள்ளது.
போக்குவரத்து மற்றும் உட்கட்டமைப்பு அபிவிருத்தி
நாட்டின் வீதிகள் மற்றும் ரயில் பாதைகளை நவீனமயப்படுத்துவதற்காக 487 பில்லியன் ரூபா ஒதுக்கீடு செய்யப்படுவதாக அறிவிக்கப்பட்டுள்ளது.
ரயில் மற்றும் பேருந்து சேவைகளை நவீனமயப்படுத்துவதற்காக 95 பில்லியன் ரூபா ஒதுக்கீடு செய்யப்பட்டுள்ளது.
ரயில் பாதைகளை மின்மயப்படுத்துவதற்காக 80 பில்லியன் ரூபா ஒதுக்க முன்மொழியப்பட்டுள்ளது. ஐந்து புதிய ரயில்களை கொள்வனவு செய்வதற்காக 5 பில்லியன் ரூபாவும், நீண்டகாலமாகப் பராமரிக்கப்படாத ரயில் நிலையங்களைப் புனரமைப்பதற்காக 2 பில்லியன் ரூபாவும் ஒதுக்கப்படவுள்ளன.
கண்டி, காலி மற்றும் யாழ்ப்பாண நகரப் பகுதிகளுக்கும் மெட்ரோ பேருந்து சேவையை விரிவுபடுத்துவதற்குத் திட்டமிடப்பட்டுள்ளது.
கண்டி பல்முக போக்குவரத்து மத்திய நிலையத்திற்கான அணுகுவீதியில் மேம்பாலம் அமைப்பதற்கும் முன்மொழியப்பட்டுள்ளது.
விவசாயம், மீன்பிடி மற்றும் கிராமிய பொருளாதாரம்
விவசாய உற்பத்தியை அதிகரிப்பதற்கும் உணவுப் பாதுகாப்பை உறுதிப்படுத்துவதற்கும் பல்வேறு நடவடிக்கைகள் முன்மொழியப்பட்டுள்ளன.
நீர்ப்பாசனத் திட்டங்களை விரைவுபடுத்துவதற்காக 77 பில்லியன் ரூபா ஒதுக்கீடு செய்யப்பட்டுள்ளது.
பயன்படுத்தப்படாத மற்றும் குறைந்த விளைச்சலைத் தரும் நெற்காணிகளை மாற்றுப் பயிர்ச்செய்கைக்குப் பயன்படுத்த ஊக்குவிப்பதற்காக 1.55 பில்லியன் ரூபா ஒதுக்கப்பட்டுள்ளது.
பெருந்தோட்டத்துறையின் அபிவிருத்திக்காக 13 பில்லியன் ரூபாவும், தோட்டத் தொழிலாளர்களுக்கு ஏற்கனவே அறிமுகப்படுத்தப்பட்ட 200 ரூபா தினசரி ஊக்குவிப்புக் கொடுப்பனவை 2027ஆம் ஆண்டிலும் தொடர்வதற்கான நிதியும் ஒதுக்கப்பட்டுள்ளன.
மீன்பிடித் துறையினருக்கு வட்டியில்லாக் கடன் திட்டமொன்றை அறிமுகப்படுத்தவும், தொழில் விபத்துக்களில் உயிரிழக்கும் மீனவர்களின் குடும்பங்களுக்கான இழப்பீட்டை ஒரு மில்லியன் ரூபாவிலிருந்து இரண்டு மில்லியன் ரூபாவாக அதிகரிக்கவும் முன்மொழியப்பட்டுள்ளது.
டிஜிட்டல் பொருளாதாரத்திற்கு ரூ.28.5 பில்லியன்
நாட்டின் டிஜிட்டல் பொருளாதாரத்தை மேம்படுத்துவதற்காக 28.5 பில்லியன் ரூபா ஒதுக்கீடு செய்ய முன்மொழியப்பட்டுள்ளது.
டிஜிட்டல் புத்தாக்க நிறுவனங்கள் மற்றும் புதிய தொழில்முனைவோரை ஊக்குவிப்பதற்காக 10 பில்லியன் ரூபா ஒதுக்கீடு செய்யப்படும்.
அரச சேவைகளை டிஜிட்டல் மயப்படுத்துதல், இணையப் பாதுகாப்பு, செயற்கை நுண்ணறிவு தொழில்நுட்பம் மற்றும் டிஜிட்டல் தொழில்முனைவோர் வளர்ச்சி ஆகியவற்றுக்கும் முக்கியத்துவம் வழங்கப்பட்டுள்ளது.
செயற்கை நுண்ணறிவுத் திறன்களை மேம்படுத்துவதற்காக AI Excellence Centre ஒன்றை நிறுவவும் முன்மொழியப்பட்டுள்ளது.
சுற்றுலாத்துறை மற்றும் முதலீட்டு ஊக்குவிப்பு
சுற்றுலாத்துறையை மேம்படுத்துவதற்காக புதிய திட்டங்கள் முன்வைக்கப்பட்டுள்ளன.
வீட்டுத் தங்குமிட சுற்றுலாத்துறையை ஊக்குவிப்பதற்காக 7.5 பில்லியன் ரூபா ஒதுக்கீடு செய்யப்படும். இதன் கீழ் தகுதியுடைய தொழில்முனைவோருக்கு 3 சதவீத வருடாந்த வட்டியில் இரண்டு மில்லியன் ரூபா வரையான சலுகைக் கடன்கள் வழங்கப்படவுள்ளன.
சுற்றுலா அபிவிருத்தி வரியை 2027 ஏப்ரல் முதலாம் திகதி முதல் நீக்கவும் முன்மொழியப்பட்டுள்ளது.
கொழும்புத் துறைமுகத்தில் கப்பல் சுற்றுலாப் பயணிகளுக்கான முனையமொன்றை நிறுவவும், காலி, தங்காலை மற்றும் திருகோணமலை ஆகிய இடங்களில் சுற்றுலாப் பயணிகளுக்கான வசதிகளை மேம்படுத்தவும் திட்டமிடப்பட்டுள்ளது.
வரி நிவாரணங்கள் மற்றும் அத்தியாவசியப் பொருட்கள்
பாடசாலைப் பயிற்சிப் புத்தகங்கள், பாடநூல்கள், அகராதிகள், கலைக்களஞ்சியங்கள் மற்றும் ஏனைய அச்சிடப்பட்ட புத்தகங்களின் இறக்குமதி மற்றும் விநியோகத்திற்கான பெறுமதி சேர் வரியை (VAT) நீக்கவும் முன்மொழியப்பட்டுள்ளது.
செய்தித்தாள் அச்சிடுவதற்கான இறக்குமதி செய்யப்படும் செய்தித்தாள்த் தாள்களுக்கு விதிக்கப்படும் துறைமுகங்கள் மற்றும் விமான நிலைய அபிவிருத்தி வரியை 2027 ஜனவரி முதலாம் திகதி முதல் நீக்கவும் திட்டமிடப்பட்டுள்ளது.
இறக்குமதி செய்யப்படும் சீனிக்கு விதிக்கப்படும் விசேட பண்ட வரியை ஒரு கிலோகிராமுக்கு 10 ரூபாவால் அதிகரிக்கவும் முன்மொழியப்பட்டுள்ளது.
அதேவேளை, இறக்குமதி செய்யப்படும் கருவாடு, மாசி மற்றும் மிளகாய் உள்ளிட்ட சில பொருட்களுக்கான விசேட பண்ட வரிகளில் குறைப்புகளும் அறிவிக்கப்பட்டுள்ளன.
எனினும், பருப்பு, வெங்காயம், பால்மா உள்ளிட்ட அதிகளவில் நுகரப்படும் பத்து அத்தியாவசியப் பொருட்களுக்கான வரிகளை நீக்குவது பொருளாதார ரீதியாகப் பாதிப்புகளை ஏற்படுத்தக்கூடும் என்பதால் அவற்றை நீக்க முடியாது என ஜனாதிபதி தெரிவித்துள்ளார்.
டிட்வா அனர்த்த மீள்கட்டமைப்புக்கு ரூ.260 பில்லியன்
சூறாவளி டிட்வா அனர்த்தத்தினால் பாதிக்கப்பட்ட பகுதிகளை மீள்கட்டமைப்பதற்காக 2027ஆம் ஆண்டில் 260 பில்லியன் ரூபா ஒதுக்கீடு செய்யப்படவுள்ளதாக ஜனாதிபதி அறிவித்துள்ளார்.
அனர்த்தத்தால் பாதிக்கப்பட்ட மக்களின் வாழ்வாதாரத்தை மீளக் கட்டியெழுப்புதல், வீடுகள் மற்றும் உட்கட்டமைப்பு வசதிகளைப் புனரமைத்தல் உள்ளிட்ட பணிகளுக்கு இந்த நிதி பயன்படுத்தப்படவுள்ளது.
அத்துடன், எதிர்கால அனர்த்தங்களை எதிர்கொள்வதற்கான முன்னெச்சரிக்கை மற்றும் அனர்த்த முகாமைத்துவ நடவடிக்கைகளுக்கும் நிதி ஒதுக்கீடு செய்யப்பட்டுள்ளது.
பொருளாதார வளர்ச்சி மற்றும் அரச கடன் முகாமைத்துவம்
நாட்டின் பொருளாதாரத்தை நிலையான வளர்ச்சிப் பாதையில் கொண்டு செல்வதே 2027ஆம் ஆண்டுக்கான வரவு செலவுத்திட்டத்தின் பிரதான இலக்காக அமைந்துள்ளது.
வருடாந்தம் 7 சதவீத பொருளாதார வளர்ச்சியை அடைவதற்கான இலக்கை அரசாங்கம் முன்வைத்துள்ளது.
மூலதனச் செலவினங்களை அதிகரிப்பதற்காக 2,000 பில்லியன் ரூபா ஒதுக்கீடு செய்யப்பட்டுள்ளதாக ஜனாதிபதி தெரிவித்துள்ளார்.
அதேவேளை, 2027ஆம் ஆண்டுக்கான மொத்த முதன்மைச் செலவினம் 5,070 பில்லியன் ரூபாவாகவும், அதில் மீண்டெழும் செலவினம் 3,320 பில்லியன் ரூபாவாகவும் மூலதனச் செலவினம் 1,750 பில்லியன் ரூபாவாகவும் மதிப்பிடப்பட்டுள்ளது.
அரச கடன் சேவைச் செலவுகள் 4,850 பில்லியன் ரூபாவாகவும், மொத்தக் கடன் பெறும் தேவை 3,800 பில்லியன் ரூபாவாகவும் கணிக்கப்பட்டுள்ளது.
சர்வதேச நாணய நிதியத்துடன் இணைந்து முன்னெடுக்கப்படும் பொருளாதார மறுசீரமைப்புத் திட்டத்தை வெற்றிகரமாக நிறைவு செய்வதற்கும் அரசாங்கம் எதிர்பார்த்துள்ளது.
26 நாட்கள் வரவு செலவுத்திட்ட விவாதம்
2027ஆம் ஆண்டுக்கான வரவு செலவுத்திட்டத்தின் இரண்டாம் வாசிப்பு மீதான விவாதம் நவம்பர் 13ஆம் திகதி முதல் 20ஆம் திகதி வரை நடைபெறவுள்ளது.
இரண்டாம் வாசிப்பு மீதான வாக்கெடுப்பு நவம்பர் 20ஆம் திகதி மாலை 6 மணிக்கு நடைபெறும்.
அதனைத் தொடர்ந்து குழுநிலை விவாதம் நவம்பர் 21ஆம் திகதி முதல் டிசம்பர் 14ஆம் திகதி வரை நடைபெறவுள்ளது. மூன்றாம் வாசிப்பு மீதான இறுதி வாக்கெடுப்பு டிசம்பர் 14ஆம் திகதி மாலை 6 மணிக்கு இடம்பெறவுள்ளது.
மொத்தம் 26 நாட்கள் நடைபெறவுள்ள இந்த வரவு செலவுத்திட்ட விவாதத்தின் பின்னரே 2027ஆம் ஆண்டுக்கான ஒதுக்கீட்டுச் சட்டமூலம் இறுதியாக அங்கீகரிக்கப்படும்.
அரச ஊழியர்களின் சம்பள அதிகரிப்பு, வரி நிவாரணங்கள், சமூகப் பாதுகாப்பு மற்றும் பாரிய உட்கட்டமைப்பு முதலீடுகளை உள்ளடக்கியுள்ள இந்த வரவு செலவுத்திட்டம், நாட்டின் பொருளாதார மீட்சியை அடுத்த கட்டத்திற்கு நகர்த்துவதற்கான அரசாங்கத்தின் முக்கிய முயற்சியாக அமைந்துள்ளது.
எனினும், முன்மொழியப்பட்டுள்ள நிவாரணங்கள் மற்றும் அபிவிருத்தித் திட்டங்கள் எந்தளவிற்கு நடைமுறையில் வெற்றிகரமாகச் செயற்படுத்தப்படுகின்றன என்பதே பொதுமக்கள் மத்தியில் எதிர்பார்ப்பை ஏற்படுத்தியுள்ள முக்கிய விடயமாகும்.
0 comments :
Post a Comment