எம்.வை. அமீர் –
தென்கிழக்குப் பல்கலைக்கழகத்தின் வெளிவாரிப் பட்டப்படிப்புகள் மற்றும் தொழில்சார் கற்கைகள் நிலையத்தின் (CEDPL) கீழ் முன்னெடுக்கப்படும் Bachelor of Information & Communication Technology (BICT) Degree Programme பரீட்சை நிர்வாகச் செயற்பாடுகளை நவீனமயப்படுத்தும் வகையில் உருவாக்கப்பட்டுள்ள புதிய Online Examination Database Management System உத்தியோகபூர்வமாக அறிமுகப்படுத்தப்பட்டுள்ளது.
இந்த புதிய டிஜிட்டல் முறைமை 2026.10.08 அன்று தென்கிழக்குப் பல்கலைக்கழக நிர்வாகக் கட்டிடக் கூட்ட மண்டபத்தில் நடைபெற்ற நிகழ்வில், பல்கலைக்கழக உபவேந்தர் பேராசிரியர் எஸ்.எம். ஜுனைடீன் அவர்களால் உத்தியோகபூர்வமாக ஆரம்பித்து வைக்கப்பட்டது.
இந்நிகழ்வில் தொழில்நுட்பவியல் பீடத்தின் பீடாதிபதி ஆர்.கே. அகமட் றிபாய் காரியப்பர், BICT கற்கைநெறியின் இணைப்பாளர் கலாநிதி ஐ.எம். காலித், தகவல் மற்றும் தொடர்பாடல் தொழில்நுட்பத் திணைக்களத்தின் தலைவர் எம்.ஜெ. அஹமட் சபானி, ஏ.ஆர். பாத்திமா ஷபானா, கலாநிதி எம்.ஐ.எப். கரீமா, ஏ.எல். சரீபுதீன், கலாநிதி ஐ. றைசல், சிரேஷ்ட உதவிப் பதிவாளர் எம்.எச். நபார், முகாமைத்துவ உதவியாளர் எம்.ஜி. றோசன் மற்றும் முகாமைத்துவ உதவியாளர் ஏ.கே. றஸீன் உள்ளிட்டோர் கலந்துகொண்டனர்.
தற்போதைய டிஜிட்டல் யுகத்தின் தேவைகளுக்கு ஏற்ப பல்கலைக்கழகக் கல்வி மற்றும் பரீட்சை நிர்வாகச் செயற்பாடுகளை தொழில்நுட்ப அடிப்படையில் முன்னெடுப்பதன் அவசியம் அதிகரித்துள்ள நிலையில், BICT பட்டப்படிப்புடன் தொடர்புடைய பரீட்சை நடவடிக்கைகளை ஒருங்கிணைத்து, விரைவாகவும் துல்லியமாகவும் முன்னெடுக்கும் நோக்கில் இந்த புதிய முறைமை உருவாக்கப்பட்டுள்ளது.
இதன் மூலம் BICT பட்டப்படிப்புக்கான பரீட்சைகளுடன் தொடர்புடைய பல்வேறு தகவல்கள், தரவுகள் மற்றும் நிர்வாகச் செயற்பாடுகளை ஒரே டிஜிட்டல் தரவுத்தளத்தின் ஊடாக நிர்வகிக்கும் வசதி ஏற்படுத்தப்பட்டுள்ளது.
மாணவர்களின் பரீட்சைத் தகவல்கள், பரீட்சை தொடர்பான தரவுகள் மற்றும் அதனுடன் இணைந்த நிர்வாகச் செயற்பாடுகளை கணினிமயப்படுத்துவதன் மூலம், பாரம்பரிய ஆவண அடிப்படையிலான செயற்பாடுகளைக் குறைத்து, நவீன மற்றும் திறன்மிக்க பரீட்சை நிர்வாகத்திற்கான அடித்தளத்தை இந்த முறைமை ஏற்படுத்துகிறது.
புதிய Online Examination Database Management System நடைமுறைக்கு வருவதன் மூலம், பரீட்சை நிர்வாகத்தில் வேகம், துல்லியம், தரவுப் பாதுகாப்பு மற்றும் வெளிப்படைத்தன்மை ஆகியவற்றை மேலும் மேம்படுத்துவதற்கான வாய்ப்பு ஏற்பட்டுள்ளது.
அத்துடன், ஒருங்கிணைந்த தரவுத்தளத்தின் மூலம் தேவையான தகவல்களை விரைவாகப் பெற்றுக்கொள்ளவும், பரீட்சை நடவடிக்கைகளின் பல்வேறு கட்டங்களின் முன்னேற்றத்தை திறம்பட கண்காணிக்கவும் முடியும்.
எதிர்வரும் காலங்களில் BICT பட்டப்படிப்பின் பரீட்சைகள் மற்றும் அவற்றுடன் தொடர்புடைய நிர்வாக நடவடிக்கைகள் அனைத்தையும் இந்த Online முறைமையின் ஊடாக முன்னெடுப்பதற்குத் திட்டமிடப்பட்டுள்ளது.
இந்த CEDPL Examination Database Management System-ஐ முழுமையாக வடிவமைத்து உருவாக்குவதில், தென்கிழக்குப் பல்கலைக்கழகத்தின் வெளிவாரிப் பட்டப்படிப்புகள் மற்றும் தொழில்சார் கற்கைகள் நிலையத்தில் பணியாற்றும் முகாமைத்துவ உதவியாளர் எம்.ஜி. றோசன் முழுமையான பங்களிப்பை வழங்கியுள்ளதுடன், அதன் செயற்பாட்டு முறைகளையும் எடுத்து விளக்கினார்.
நிலையத்தின் பரீட்சை நிர்வாகத் தேவைகள் மற்றும் நடைமுறைச் செயற்பாடுகளை கருத்திற்கொண்டு உருவாக்கப்பட்டுள்ள இம்முறைமை, பல்கலைக்கழகத்தின் உள்ளக மனிதவளத்தையும் தொழில்நுட்ப அறிவையும் பயன்படுத்தி உருவாக்கப்பட்டுள்ள குறிப்பிடத்தக்க டிஜிட்டல் தீர்வாக அமைந்துள்ளது.
தென்கிழக்குப் பல்கலைக்கழகத்தின் கல்வி மற்றும் நிர்வாகச் செயற்பாடுகளில் டிஜிட்டல் தொழில்நுட்பத்தைப் பயன்படுத்தும் முயற்சிகள் தொடர்ந்து முன்னெடுக்கப்பட்டு வரும் நிலையில், BICT பட்டப்படிப்புக்கான புதிய Online Examination Database Management System அறிமுகம் அதற்கான மற்றுமொரு முக்கியமான முன்னேற்றமாகக் கருதப்படுகிறது.
குறிப்பாக, தகவல் மற்றும் தொடர்பாடல் தொழில்நுட்பத் துறையில் பட்டப்படிப்பைத் தொடரும் மாணவர்களுக்கான பரீட்சை நிர்வாகச் செயற்பாடுகளே தொழில்நுட்ப அடிப்படையிலான புதிய முறைமைக்கு உட்படுத்தப்படுவது இதன் சிறப்பம்சமாகும்.
இதன் மூலம் “கல்வி நிர்வாகத்தில் டிஜிட்டல் மாற்றம்” என்ற நோக்கத்தை நடைமுறைப்படுத்துவதற்கான புதிய வாய்ப்பு உருவாகியுள்ளதுடன், எதிர்காலத்தில் பல்கலைக்கழகத்தின் ஏனைய கல்வி மற்றும் நிர்வாகச் செயற்பாடுகளிலும் இத்தகைய தொழில்நுட்பத் தீர்வுகளை விரிவுபடுத்துவதற்கான அடித்தளமும் ஏற்படுத்தப்பட்டுள்ளது.
BICT பட்டப்படிப்பின் பரீட்சை நிர்வாகத்தில் ஆரம்பிக்கப்பட்டுள்ள இந்த புதிய டிஜிட்டல் அத்தியாயம், எதிர்காலத்தில் பரீட்சை நடவடிக்கைகளை மேலும் விரைவான, ஒழுங்கமைந்த, துல்லியமான மற்றும் திறன்மிக்க முறையில் முன்னெடுப்பதற்கு வழிவகுக்கும் என எதிர்பார்க்கப்படுகிறது.
0 comments :
Post a Comment