முஸ்லிம் அரசியல் தலைமைகள் தேர்தல் காலங்களில் மாத்திரம் சமூகத்தை அணுகாமல், முஸ்லிம் சமூகத்தின் இருப்புக்கும் உரிமைகளுக்கும் அச்சுறுத்தல் ஏற்படும் சந்தர்ப்பங்களிலும் களத்தில் இறங்கி செயற்பட வேண்டும் என முன்னாள் இராஜாங்க அமைச்சர் சட்டத்தரணி எச்.எம்.எம். ஹரீஸ் வலியுறுத்தினார்.
கல்முனையில் இஸ்லாமிய சமூக சங்கம் சனிக்கிழமை மாலை ஏற்பாடு செய்திருந்த நிகழ்வில் பிரதம அதிதியாகக் கலந்துகொண்டு உரையாற்றிய போதே அவர் இதனைத் தெரிவித்தார்.
சவுதி அரேபியாவில் மரண தண்டனை விதிக்கப்பட்ட இலங்கையைச் சேர்ந்த அனோஜனின் விடயத்தில், முஸ்லிம் பாராளுமன்ற உறுப்பினர்கள் ஒன்றிணைந்து சவுதி மன்னரிடம் அவரது விடுதலை தொடர்பில் வேண்டுகோள் விடுத்ததைச் சுட்டிக்காட்டிய ஹரீஸ், மனிதாபிமான அடிப்படையில் மேற்கொள்ளப்பட்ட அந்த முயற்சியைப் போன்று, இலங்கையிலும் முஸ்லிம் சமூகத்தின் பிரச்சினைகளுக்கு அரசியல் தலைமைகள் ஒன்றிணைந்து செயற்பட வேண்டும் என்றார்.
கல்முனை வடக்கு வைத்தியசாலையில் முஸ்லிம் பெண்கள் மதக் கடமையின் அடிப்படையில் தலையை மறைத்துச் செல்வது தொடர்பாக ஏற்பட்ட பிரச்சினையில், தமிழ் அரசியல் தலைமைகள் போதிய அக்கறையுடன் செயற்படவில்லை எனவும் அவர் கவலை தெரிவித்தார்.
இவ்வாறான விடயங்களில் சட்ட ரீதியான நடைமுறைகள் குறித்து பேசுவதுடன், மனிதாபிமான மற்றும் சமூக நல்லிணக்கக் கண்ணோட்டத்திலும் பிரச்சினைகளுக்குத் தீர்வு காண முயற்சிக்க வேண்டும் என அவர் குறிப்பிட்டார்.
கல்முனை மாநகரம் தமிழ், முஸ்லிம், பௌத்த மற்றும் கிறிஸ்தவ மக்கள் நீண்டகாலமாக இணைந்து வாழும் முக்கிய பிராந்தியமாகும் எனத் தெரிவித்த ஹரீஸ், அதன் நிர்வாகப் பிரிப்பு தொடர்பான எந்தவொரு நடவடிக்கையும் இரு சமூகங்களின் தலைமைகளுடனும் சிவில் சமூகத்துடனும் கலந்துரையாடி முன்னெடுக்கப்பட வேண்டும் என்றார்.
தமிழ் மக்களின் உரிமைகள் தொடர்பான கோரிக்கைகள் நியாயமானவையாக இருக்குமானால், அவை தொடர்பில் முஸ்லிம் தலைமைகளுடன் கலந்துரையாடி தீர்வுகளை எட்டுவதற்கான வாய்ப்பு இருப்பதாகவும் அவர் தெரிவித்தார்.
முஸ்லிம் சமூகத்திற்கு பாதிப்பை ஏற்படுத்தக்கூடிய நிர்வாக மாற்றங்களை நீதிமன்றத்தின் ஊடாக முன்னெடுப்பதற்கு முன்னர், தமிழ்–முஸ்லிம் அரசியல் தலைமைகள் பரஸ்பர பேச்சுவார்த்தை மூலம் தீர்வைக் காண முயற்சிக்க வேண்டும் எனவும் அவர் வலியுறுத்தினார்.
கடந்த காலங்களில் ஏற்பட்ட தவறுகள் மீண்டும் உருவாகாத வகையில், இரு சமூகங்களினதும் உரிமைகளை மதிக்கும் அணுகுமுறையே உண்மையான நல்லிணக்கத்திற்கான அடிப்படையாக அமைய வேண்டும் எனவும் ஹரீஸ் தெரிவித்தார்.
மேலும், ஒரு முக்கியமான சமூகப் பிரச்சினையில் முஸ்லிம் பாராளுமன்ற உறுப்பினர்கள் ஒன்றிணைந்து கையொப்பமிட்டு நடவடிக்கை எடுத்ததைப் போன்று, கல்முனை முஸ்லிம் மக்களின் உரிமைகள் தொடர்பான பிரச்சினையிலும் அவர்கள் ஒன்றுபட்டு செயற்பட வேண்டும் என அவர் வேண்டுகோள் விடுத்தார்.
“ஹக்கீம், றிசாத் போன்ற தலைவர்கள் தேர்தல் காலங்களில் மாத்திரம் முஸ்லிம் சமூகத்தை அணுகாமல், சமூகத்தின் இருப்புக்கும் உரிமைகளுக்கும் அச்சுறுத்தல் ஏற்படும் சந்தர்ப்பங்களிலும் களத்தில் இறங்க வேண்டும்” எனவும் ஹரீஸ் வலியுறுத்தினார்.
கல்முனை மற்றும் அம்பாறை மாவட்ட முஸ்லிம் மக்களின் உரிமைகள் தொடர்பில் தமிழ் மற்றும் முஸ்லிம் அரசியல் தலைமைகள் பரஸ்பர புரிந்துணர்வு மற்றும் பேச்சுவார்த்தையின் மூலம் நீதியான தீர்வை எட்டுவதற்கான முயற்சிகளை முன்னெடுக்க வேண்டும் என்பதே தமது முக்கிய வேண்டுகோள் எனவும் அவர் தெரிவித்தார்.
0 comments :
Post a Comment