தென்கிழக்குப் பல்கலைக்கழகத்தில் தந்தை செல்வா, 127ஆம் ஆண்டு நினைவு தின சொற்பொழிவும் கலந்துரையாடலும்!

இலங்கைத் தமிழர் அரசியல் வரலாற்றில் “தந்தை செல்வா” என அழைக்கப்படும் எஸ்.ஜே.வி. செல்வநாயகம் அவர்களின் 127ஆம் ஆண்டு நினைவு நாளை முன்னிட்டு, தென்கிழக்குப் பல்கலைக்கழக கலை கலாச்சார பீடத்தின் அரசியல் விஞ்ஞானத்துறை மற்றும் செல்வநாயகம் நினைவு அறக்கட்டளை என்பன இணைந்து நடாத்திய “நினைவு நாள் சொற்பொழிவும் கலந்துரையாடலும்” 2025.09.03 ஆம் திகதி பீடத்தில் பிரதான கேட்போர் கூடத்தில் இடம்பெற்றது.

நிகழ்வில் வரவேற்புரையை – செல்வநாயகம் நினைவு அறக்கட்டளையின் பிரதான அறங்காவலர் எஸ்.சி.சி. இளங்கோவன் நிகழ்த்தினார். அறிமுக உரையை– தென்கிழக்குப் பல்கலைக்கழக கலை கலாச்சார பீடத்தின் அரசியல் விஞ்ஞானத் துறைத் தலைவர் கலாநிதி எம். அப்துல் ஜப்பார் நிகழ்த்தினார். உபவேந்தர் பேராசிரியர் (கலாநிதி) எஸ்.எம். ஜுனைதீன் நிகழ்வில் பிரதான உரையாற்றிச் சிறப்பித்தார்.

இங்கு “செல்வநாயகத்தின் நிலையான பாரம்பரியம்: நவீன இலங்கைக்கான சமூக மற்றும் அரசியல் பாடங்கள்” என்ற தலைப்பில் முன்னாள் உபவேந்தர் பேராசிரியர் (கலாநிதி) றமீஸ் அபூபக்கர் ஆழமான உரையை நிகழ்த்தினார். “வாக்குறுதிகளும் முறியடிக்கப்பட்ட ஒப்பந்தங்களும்: இலங்கை அரசு மற்றும் செல்வநாயகம்” என்ற தலைப்பில் கலாநிதி எம். அப்துல் ஜப்பார் கருத்துகளை முன்வைத்தார். “கிழக்கு மாகாண அடையாள அரசியல்: சமஷ்டி அரசு குறித்த செல்வநாயகத்தின் பார்வை” என்ற தலைப்பில் கிழக்குப் பல்கலைக்கழக பேராசிரியர் தணபாலசிங்கம் கிருஷ்ணமோகன் உரையாற்றினார். “இலங்கைச் சிறுபான்மையினரைக் ஒன்றிணைத்த அரசியல் தந்தை: எஸ்.ஜே.வி. செல்வநாயகம்” என்ற தலைப்பில் கலை கலாச்சார பீடத்தின் பீடாதிபதி பேராசிரியர் (கலாநிதி) எம்.எம். பாஸில் உரையாற்றினார். “முஸ்லிம் தேசிம்: செல்வநாயகத்தை மையமாகக் கொண்ட ஒரு அரசியல் உரையாடல்” என்ற தலைப்பில் சிரேஷ்ட பேராசிரியர் (கலாநிதி) எம்.ஏ. எம். றமீஸ் அப்துல்லாஹ் தனது கருத்துக்களை பகிர்ந்துகொண்டார்.

உபவேந்தர் பேராசிரியர் (கலாநிதி) எஸ்.எம். ஜுனைதீன் தனது உரையில்; “ஈழத்தின் காந்தி” எனப் போற்றப்படும் தந்தை செல்வநாயகம் அவர்கள், இன்று மரியாதையுடன் நினைவு கூரப்படுகிறார். அவருடைய 127ஆம் ஆண்டு பிறந்த நாள் மற்றும் 41ஆம் ஆண்டு நினைவு தினத்தை முன்னிட்டு, உங்கள்முன் சில சிந்தனைகளை பகிர்வது எனக்குக் கிடைத்த ஒரு அரிய வாய்ப்பாகும்.

தந்தை செல்வாவின் வாழ்க்கையும் அரசியல் பயணமும் அஹிம்சை, நீதி, ஜனநாயகம் ஆகியவற்றின் மீது ஆழ்ந்த அர்ப்பணிப்பை கொண்டிருந்தது. அவர், சிறுபான்மை சமூகங்களின் உரிமைகளை உறுதியாக காக்க வேண்டும் என்றும், சமாதானம் மற்றும் ஒற்றுமை என்ற வழியாக மட்டுமே உண்மையான முன்னேற்றம் சாத்தியமென்றும் நம்பினார்.

அவர் கூறிய அரசியல் நோக்கம் மிகத் தெளிவானது:

• அரசியல் என்பது அதிகாரம் பெறுவதற்கான போராட்டம் அல்ல.

• அது வன்முறையிலும் பழிவாங்கலிலும் அமையக் கூடாது.

• மாறாக, அரசியல் என்பது உரையாடல், கொள்கை, சமாதானம், நீதி ஆகியவற்றின் அடிப்படையில் அமைய வேண்டியது.

அவரது அரசியல் பார்வை, சமூகங்களுக்கு இடையே பாலமாக இருந்து, ஒற்றுமை மற்றும் நீதியின் அடித்தளம் அமைக்க வேண்டும் என்ற நோக்கத்தைக் கொண்டது.

பல்கலைக்கழகங்கள் அரசியல் மற்றும் சமூக ஆராய்ச்சிகளுக்கான மையமாக செயல்பட வேண்டும் என்பதையும், கல்வி வாயிலாக சமூகத்தின் முன்னேற்றத்துக்கு பங்களிக்க வேண்டும் என்பதையும் அவர் வலியுறுத்தினார்.

இன்றைய நினைவு நிகழ்வின் மூலம், நாம் அனைவரும் ஒரு செய்தியை மீண்டும் உணர வேண்டும்:

அரசியல் என்பது பிளவை ஏற்படுத்துவதற்கானது அல்ல; அது மக்களை இணைக்கும் ஒரு சக்தியாக இருக்க வேண்டும்.

தந்தை செல்வாவின் வாழ்நாள் பங்களிப்பு, எப்போதும் நீதிக்கும் ஒற்றுமைக்கும் வழிகாட்டும் விளக்காக இருக்கும். அவரின் பாரம்பரியத்தை நினைவுகூர்ந்து, நாம் ஒற்றுமை, சமாதானம், முன்னேற்றம் ஆகியவற்றுக்காக உறுதிப்படியாகச் செயல்படுவோம் என்றார்.

வரவேற்புரையாற்றிய செல்வநாயகம் நினைவு அறக்கட்டளையின் பிரதான அறங்காவலர் எஸ்.சி.சி. இளங்கோவன்; இந்த இனிய காலையில் தலைவர் அஷ்ரஃப் அவர்களின் கனவை நினைவுகூரும் விதமாக, தென்கிழக்குப் பல்கலைக்கழக வளாகத்தில் தந்தை செல்வா அவர்களின் நினைவு நிகழ்வை நடத்துவதற்கு எனக்கு வாய்ப்பு கிடைத்துள்ளது என்பது மிகுந்த பெருமையாகும்.

தலைவர் அஷ்ரஃப் அவர்கள் நீண்ட நோக்கு கொண்ட கனவுகளை கண்டவர். அதில் முக்கியமானது, வடகிழக்கு பகுதிகளில் உயர்ந்த தரத்தில் கல்வி வழங்கக்கூடிய ஒரு பல்கலைக்கழகம் அமைவது. இன்று தென்கிழக்குப் பல்கலைக்கழகம் அந்தக் கனவை நனவாக்கி, சமூக முன்னேற்றத்திற்கு பெரும் பங்கு வகித்து வருவது நம்மை பெருமைப்படச் செய்கிறது.

இத்தகைய கல்வி நிலையத்தில் தந்தை செல்வநாயகம் அவர்களை நினைவுகூரும் நிகழ்வை முதல் முறையாக நடத்துவதும் ஒரு வரலாற்றுப் பெருமை. கடந்த சில ஆண்டுகளாக பல பல்கலைக்கழகங்களோடு இணைந்து நாங்கள் இதுபோன்ற நிகழ்வுகளை நடத்தியிருக்கிறோம். யாழ்ப்பாணம், கிளிநொச்சி, வவுனியா, மட்டக்களப்பு, அம்பாறை போன்ற இடங்களிலும் மாணவர்களும் கல்வியாளர்களும் இணைந்து நிகழ்வுகளை நடத்தி வந்தோம். ஆனால் இங்குதான் எதிர்கால புலமைகள் உருவாகின்றன, புதிய சிந்தனைகள் உருவாகின்றன. எனவே, இந்த நினைவு நிகழ்வுகள் மாணவர்களுக்குள் விவாதத்தையும் சிந்தனையையும் தூண்டுவதே எங்களுடைய நோக்கம்.

இதற்கான வாய்ப்பை அளித்த உபவேந்தர் பேராசிரியர் ஜுனைடீன் அவர்கள் மற்றும் அரசியல் அறிவியல் துறையின் பேராசிரியர்களுக்கு நன்றி தெரிவித்துக்கொள்கிறோம். மேலும், யாழ்ப்பாணம் மற்றும் மட்டக்களப்பில் சிறப்பான நினைவு உரைகளை வழங்கிய பேராசிரியர் எம். ஏ. எம். ரமீஸ் அப்துல்லாஹ அவர்களுக்கும் நன்றி தெரிவித்துக் கொள்ளுகிறோம்.

சிலர் கேட்கலாம்: “ஏன் இந்த நிகழ்வுகள்? இதில் என்ன நடக்கிறது? அரசியல் செய்யப்படுகிறதா?” என்று. அதற்கு தெளிவாகச் சொல்ல வேண்டும். தந்தை செல்வா நினைவு அறக்கட்டளை என்பது எந்த அரசியல் சாயலுமில்லாமல், அவருடைய வாழ்க்கைத் தத்துவங்களையும் கொள்கைகளையும் இளைஞர் தலைமுறைக்கு எடுத்துச் செல்லும் நோக்கத்தோடு செயல்பட்டு வருகிறது. உண்மையில் அவருடைய வாழ்க்கை அரசியலோடு பிணைந்திருந்தாலும், அவருடைய கனவுகளும், கொள்கைகளும், தமிழர் சமூகத்தின் எதிர்காலத்தையும், தமிழர்-முஸ்லிம் உறவுகளையும் வலுப்படுத்தும் வகையில் இருந்தன.

ஆகையால், இந்த நினைவு நிகழ்வுகள் அரசியலுக்காக அல்ல, கல்விக்காகவும், சிந்தனைக் களத்தைக் கட்டியெழுப்புவதற்கும் நடத்தப்படுகின்றன என்பதை வலியுறுத்துகிறேன்.

தென்கிழக்குப் பல்கலைக்கழக கலை கலாச்சார பீடத்தின் அரசியல் விஞ்ஞானத் துறைத் தலைவர் கலாநிதி எம். அப்துல் ஜப்பார் உரையாற்றும்போது; நாம் இன்று ஒன்றுகூடியதற்கு காரணம், தந்தை செல்வநாயகம் அவர்களின் நினைவுகளையும், அவருடைய வாழ்க்கை பாடங்களையும் போற்றுவதற்காகவே.

ஆரம்பத்தில் ஏன் நான் இவ்வாறு கைகூப்பி காலை வணக்கம் என்று முதல் கூறினேன் என்று யோசித்தால், அதற்கு ஒரு அர்த்தம் இருக்கிறது. அது தந்தை செல்வாவின் வழிகாட்டல். 1946ஆம் ஆண்டில், அவர் சமூக உரிமைக்காகக் குரல் கொடுத்த முதல் மனிதராகத் திகழ்கிறார்.

அவருடைய போராட்டம் தமிழ் மொழிக்கு எதிரான அநீதி மற்றும் சமூகப் பாகுபாட்டை எதிர்த்து நடைபெற்றது. அந்த போராட்டம் பின்னர் வெற்றி பெற்றது. சட்ட ரீதியாக பதிமூன்றாவது மற்றும் பதினாறாவது திருத்தச் சட்டங்களின் மூலம் அங்கீகரிக்கப்பட்டது.

ஆனால் நடைமுறையில் இன்னும் சவால்கள் காணப்படுகின்றன. இதை உணர்த்தும் வகையில், நாம் இங்கு ஒன்று கூடியிருக்கிறோம். தந்தை செல்வா அவர்கள் மலேசியாவில் பிறந்தார்.

இலங்கைக்கு வந்ததும், 1946ஆம் ஆண்டுகளில், அரசியலில் முழுமையாக ஈடுபட்டார்.

சிறுபான்மையினருக்கான நலன், சமுதாய ஒற்றுமை, அரசியல் அவர் வாழ்நாளை அர்ப்பணித்தார். அந்த காலத்தில், பிரித்தானிய அரசாங்கத்தின் சோல்வரி கமிஷன், சிறுபான்மையினரின் நலன்களைப் பாதுகாப்பதில் தோல்வி பெற்றது. அது மட்டுமல்லாமல், அரசியல் வகைப்பாட்டால் ஏற்பட்ட பிரச்சினைகள், சமூகத்தில் ஏற்படும் அநீதிகள்—இவற்றுக்கு எதிராக தந்தை செல்வா போராடினார்.

அவரும், அவரது அரசியல் சகாக்களும், இலங்கை தமிழரசுக் கட்சியை ஆரம்பித்து, மக்களின் உரிமைகளுக்காக அர்ப்பணித்தனர். அவருடைய வாழ்க்கை, தியாகங்கள், சமூகப் போராட்டங்கள், அஹிம்சையின் வழி செயல்பாடுகள், சமூக ஒற்றுமைக்காகச் செய்த செயல்கள் அனைத்தும் நமக்கு வழிகாட்டி. இவற்றை அவரது அதிகாரப்பூர்வ இணையதளத்தில் விரிவாகப் பார்க்க முடியும்.

அன்றைய காலகட்டத்தில் பல சவால்கள் இருந்தும், தந்தை செல்வா வெறுமனே சமூகப் போராட்டத்தில் மட்டுமல்லாமல், அடுத்த தலைமுறைக்கான வழிகாட்டியாகவும் திகழ்ந்தார்.

அதனால் இன்று நாம் செய்ய வேண்டியது என்னவென்றால், அவருடைய அந்தக் கடமையுணர்வை தொடர்ந்தும், சமூகத்தையும், மாணவர்களையும், எதிர்கால தலைமுறையையும் வழிநடத்துவதே.

இந்த நிகழ்வின் முக்கிய நோக்கம்:

1. தந்தை செல்வாவின் நினைவுகளை போற்றுவது

2. அவருடைய வாழ்க்கை பாடங்களை மாணவர்களுக்கு எடுத்துரைப்பது

3. சமூகத்தின் ஒற்றுமை மற்றும் மொழி உரிமைக்கான விழிப்புணர்வை அதிகரிப்பது

எங்கள் மாணவர்கள், பேராசிரியர்கள், சமூகத் தலைவர்கள், ஊடகவியலாளர்கள் உள்ளிட்ட அனைவரும் இன்று இந்நிகழ்வில் பங்குபெற்று, அந்த நோக்கத்தை உறுதிப்படுத்துகின்றனர். நமது வாழ்வில் தந்தை செல்வா காட்டிய பாதையைப் பின்பற்றுவோம். அவருடைய முயற்சிகள் நமக்கு ஒரு தீபமாக விளங்கட்டும்.

அவர் தொடங்கிய போராட்டம், அவர் உருவாக்கிய குரல், இன்று நம்மை வழிநடத்தட்டும். என்று தெரிவித்தார்.

முன்னாள் உபவேந்தர் பேராசிரியர் (கலாநிதி) ஏ. ரமீஸ் தனது உரையில்; நான் இங்கு தந்தை செல்வாவின் வாழ்க்கை, சாதனைகள், சமூக சேவை, அரசியல் தாராள மனப்பான்மை மற்றும் அவருடைய நீடித்த தாக்கத்தை விரிவாகப் பகிர்ந்து கொள்ளப்போகிறேன்.

தந்தை செல்வா, பிறப்புப் பெயர் S.J.V. Selvanayakam, 1926-ஆம் ஆண்டு மலேசியாவின் லோங்கன் க் பகுதியில் பிறந்தார். அவரின் கல்வி மற்றும் படிப்பு மிகவும் சிறப்பாக இருந்தது: கொழும்பு பல்கலைக்கழகத்தின் பி.எஸ்.சி பட்டதாரி. பிறகு இலங்கையின் லோக்கல் கல்லூரியில் படித்து கிராஜுவேட் பட்டம் பெற்றார். தந்தை செல்வா ஒரு அஹிம்ஸா மற்றும் வன்மை இல்லாத போராட்டத்தின் தலைவராக விளங்கினார். தமிழ் மக்களின் மொழி, பண்பாடு, சமூக அடையாளம் மற்றும் சமத்துவத்திற்காக அவர் தொடர்ந்து செயல்பட்டார். இதனால் அவரை “தமிழ் காந்தி” எனவும் அழைக்கிறார்கள்.

1956 ஆம் ஆண்டு, சிங்கள மொழி தனிச்சட்டத்திற்கு எதிராக தந்தை செல்வா முன்னெடுத்த போராட்டம் மிகவும் முக்கியமானது. Gold Face Green Fort Protest மற்றும் யாழ்ப்பாணத்தில் 1961-ஆம் ஆண்டு நடைபெற்ற சத்யாகிரஹா போன்ற நிகழ்வுகள் அவருடைய போராட்ட மனப்பான்மையை வெளிப்படுத்துகின்றன.

அவருடைய கருத்து எப்போதும் தெளிவாக இருந்தது: "A fight is not with violence but with the strength of truth and justice following the path of ahimsa to our rights." அவர் வன்மை இல்லாமல், நீதியின் வழியில் மட்டுமே தமிழ் மக்களின் உரிமைகளை பெற்றார். தந்தை செல்வா ஒருபக்கம் தமிழ் மொழி மற்றும் பண்பாட்டிற்காக போராடினார், மற்றுபுறம் சமூக அமைதியைப் பாதுகாப்பதற்கும் முன்னெடுத்தார். 1956ஆம் ஆண்டு சிங்கள தனிச்சட்டத்திற்கு எதிராக கூறியதாவது: "A language policy that elevates one community over another sow’s division and injustice." மொழியால் பிரிவு மற்றும் அநீதி உருவாகக்கூடாது என்பது அவர் நம்பிக்கை. அதனால், தமிழ் மொழி தேசிய மொழியின் சம உரிமையைப் பெற வேண்டும் என்று அவர் வலியுறுத்தினார்.

தந்தை செல்வா நேர்மையானவர்; எந்த ஊழல், அதிகாரப்போக்கு வழிகளிலும் ஈடுபடவில்லை. சுப்ரீம் கோர்ட்டின் ஜட்ஜ் பதவியை அவர் நிராகரித்ததன் மூலம் தனது நேர்மையைத் தாங்கினார். அவர் கிறிஸ்துவர் ஆனாலும், தமிழ் மக்களின் மற்றும் சிறுபான்மை மக்களின் உரிமைகளைப் பாதுகாத்தார். அவர் சிறுபான்மை பிரச்சினைகளுக்காக அரசியல் தீர்வு காண முனைந்தார். கனடாவில் University of Toronto இல் 2013-ஆம் ஆண்டு நிறுவப்பட்ட S.J.V. Selvanayakam Archive அவரது முன்னணி பங்களிப்பை விரிவாக பதிவு செய்கிறது.

எந்த தலைவரும் விமர்சனமின்றி இருக்க முடியாது; சிலர் அவரை அதிகாரப்போக்கு, பிரிவினை உருவாக்கியவர், செபரேடிஸ்ட் என்று விமர்சித்தனர். ஆனால் உண்மையில், அவர் தொடங்கிய பெடரலிஸ்ட் கோரிக்கையிலிருந்து தனிநாட்டு கோரிக்கைக்கு மாற்றம் மக்கள் நிலைமையின் காரணமாக உருவானது. இது தமிழ் மக்களின் நீண்ட கால ஏமாற்றம் மற்றும் அநீதி காரணமாகவே ஏற்பட்டது.

தந்தை செல்வாவின் வாழ்நாள், போராட்டங்கள், சமூக சேவை மற்றும் நீடித்த பங்களிப்பு தமிழ் மக்களின் உரிமைகள், மொழி, பண்பாடு மற்றும் சமத்துவத்தின் நிலைப்பாட்டில் ஒரு நிலையான தாக்கத்தை ஏற்படுத்தியது.

நாம் இவருடைய வாழ்க்கையைப் பற்றி ஆராயும் போது, அவரின் தாராள மனப்பான்மை, நேர்மை மற்றும் சமூக நலனை முன்னிறுத்திய தலைமை ஆகியவற்றைப் போற்ற வேண்டும். என்றார்.

கிழக்குப் பல்கலைக்கழக பேராசிரியர் தணபாலசிங்கம் கிருஷ்ணமோகன் தனது உரையில்; கிழக்கு மாகாண அரசியலுடன் தொடர்புடையது. தமிழர் – முஸ்லிம் உறவு, சமஷ்டி கொள்கை, தந்தை செல்வா அவர்களின் கனவு ஆகியவற்றைச் சுற்றி நீண்ட காலமாக எனக்குள் சிந்தனைகள் நடைபெற்று வருகின்றன.
1925 ஆம் ஆண்டு கண்டி தேசிய பேரவையில் பண்டாரநாயக்கா முன்வைத்த சமஷ்டி (federal) யோசனை இலங்கையில் தனித்துவமிக்க சமூகங்களுக்கு சுயாட்சி வழங்கும் நோக்கத்துடன் உருவானது. பின்னர் தமிழரசுக் கட்சி இதனைத் தன் முக்கியக் கோரிக்கையாக ஏற்றுக்கொண்டது. 1956 தேர்தலில் வட, கிழக்கில் பெரும் ஆதரவு கிடைத்தது. ஆனால் மத அடையாளம் ஒதுக்கப்பட்ட போதிலும், மொழி அடிப்படையில் தமிழ் மற்றும் முஸ்லிம் மக்களின் ஒற்றுமை வலியுறுத்தப்பட்டது. ஆரம்பத்தில் இணைவு இருந்தாலும், முஸ்லிம் சமூகம் தங்கள் தனித்துவத்தை வலியுறுத்தியபோது முரண்பாடுகள் தோன்றின. இதன் விளைவாக 1986 இல் அஷ்ரப் சிறிலங்கா முஸ்லிம் காங்கிரஸை உருவாக்கினார். பின்னர் நடந்த அரசியல் நிகழ்வுகள், ஒப்பந்தங்கள், மற்றும் 1990களின் சூழ்நிலை இரு சமூகங்களுக்கிடையிலான இடைவெளியை அதிகரித்தன.

தென்கிழக்கு பல்கலைக்கழக மாணவர்கள் 2003 இல் வெளியிட்ட பிரகடனத்தில் முஸ்லிம்களுக்கு சமஷ்டி முறையிலே சுயாட்சி வேண்டும், புனர்வாழ்வு நிதிகளில் பங்கு கிடைக்க வேண்டும், சமாதான பேச்சுவார்த்தைகளில் முஸ்லிம் பிரதிநிதிகள் பங்கு பெற வேண்டும் என்பன வலியுறுத்தப்பட்டன.
தந்தை செல்வா விரும்பியது தமிழ் பேசும் மக்களின் உரிமை. ஆனால் அது காலப்போக்கில் தமிழ் மக்களின் பிரச்சினையாக மட்டுமே சுருக்கப்பட்டுவிட்டது. இன, மத, மொழி அடையாளங்களைத் தாண்டி வாழ்வியல் ஒற்றுமை உருவாகவில்லை என்பதே எங்கள் மிகப்பெரிய தோல்வி.
வடக்கு – கிழக்கு இணைப்பு தோல்வியடைந்தது. 2008க்குப் பின் கிழக்கு மாகாணத்தில் புதிய அரசியல் அணிகள் உருவாகி, தமிழ் கட்சிகள் பின்வாங்கின. இதனால் தமிழ் சமூகத்துக்குள் மனக்குறைகள், தலைமைத்துவப் பிரச்சினைகள், பிரிவினைகள் அதிகரித்தன.

யாழ்ப்பாணம் – மட்டக்களப்பு சமூகங்களுக்கு இடையே திருமணம், சொத்து, கலாச்சாரம், உணவு வழக்குகள் என பல்வேறு வேறுபாடுகள் உள்ளன. மொழி மட்டுமே இணைப்புக் கருவியாக இருந்தது. ஆனால் வாழ்வியலில் ஒற்றுமை இல்லாமை அரசியலிலும் புலப்பட்டது.

வரலாறு சொல்லும் பாடம் தெளிவாக இருக்கிறது: வன்முறை காரணமாக தற்காலிகமாக உருவான ஒற்றுமை நிலைக்க முடியாது. உண்மையான வாழ்வியல் ஒற்றுமையே சமூகத்தையும் அரசியலையும் வலுப்படுத்தும். அதற்காக இன, மத, மொழி எல்லைகளைத் தாண்டிய புதிய சிந்தனை தேவை என்றார்.

தலைப்பில் கலை கலாச்சார பீடத்தின் பீடாதிபதி பேராசிரியர் (கலாநிதி) எம்.எம். பாஸில் தனது உரையில்;

இன்று நாங்கள் தென்கிழக்கு பல்கலைக்கழகத்தில் அரசியல் தந்தை எஸ்.ஜே.வி. செல்வநாயகம் அவர்களின் 127ஆவது நினைவு நாளை கொண்டாடுகிறோம். “இலங்கையின் சிறுபான்மை சமூகங்களை ஒன்றிணைப்பதில் எஸ்.ஜே.வி. செல்வநாயகம்” என்பதே எனது உரையின் தலைப்பு.

செல்வநாயகம் அவர்கள் தமிழ் பேசும் மக்களை மட்டுமல்லாமல், மலையகத் தமிழர்கள், முஸ்லிம்கள், கிறிஸ்தவர்கள் என அனைவரையும் இணைத்து, சமத்துவமான தேசம் ஒன்றை உருவாக்கும் கனவை கொண்டிருந்தார். சமூக நீதி, உரிமைகள், மனித மரியாதை என்பவற்றை அரசியலின் மையமாகக் கொண்டவர்.

உலகில் கிளார்க், மார்ட்டின் லூதர் கிங் போன்ற தலைவர்கள் சிறுபான்மையினருக்காகப் போராடியதுபோல், இலங்கையில் அந்தப் பங்கு வகித்தவர் எஸ்.ஜே.வி. செல்வநாயகம். அவரை அரசியல் சுடர் விளக்காக பலரும் குறிப்பிட்டுள்ளனர்.

ஆனால் அவர் மறைந்தபின், சிறுபான்மை சமூகங்களை ஒன்றிணைக்கும் தலைமைத்துவம் வெற்றிடமாகவே உள்ளது. இன்று மீண்டும் ஒரு கேள்வி எழுகிறது – இந்த நாட்டில் சிறுபான்மையினரை ஒன்றிணைக்கும் புதிய தலைவரை நாம் பெறுவோமா? இதைத்தான் இந்நிகழ்வு நம்மை சிந்திக்க வைக்கிறது.என்றார்.

சிரேஷ்ட பேராசிரியர் (கலாநிதி) எம்.ஏ. எம். றமீஸ் அப்துல்லாஹ் தனது கருத்துரையில்; இன்று பேச விரும்பும் தலைப்பு “முஸ்லிம் தேசியம்.” இது எங்களால் திட்டமிட்டு முன்வைக்கப்பட்ட கோட்பாடு அல்ல. ஆனால், வரலாற்றிலும் அரசியலிலும் ஏற்பட்ட சூழ்நிலைகளால்,
முஸ்லிங்கள் தமது தேசிய அடையாளத்தை வலியுறுத்த வேண்டிய நிலை ஏற்பட்டது.

கடந்த யாழ்ப்பாண உரையில் நான் சுட்டிக்காட்டியது போல,
தமிழீழம் தோல்வியுற காரணங்களில் முக்கியமானவை இரண்டு:

· ஒன்று, தமிழ் கட்சிகளுக்குள் ஏற்பட்ட உட்கட்சி மோதல்கள்;

· இரண்டாவது, முஸ்லிம் சமூகத்தை புறக்கணித்தது.

இதுதான் முஸ்லிம் சமூகத்தை அரசியல் ரீதியாகச் சிந்திக்கத் தள்ளியது. இலங்கை முஸ்லிம்கள் வெறும் வர்த்தகத்தில் ஈடுபட்ட சமூகமாக மட்டும் இல்லாமல், தமது தனித்துவ அடையாளம் காக்கும் வலிமையான அரசியல் சக்தியாக மாறினர்.

இதை பல அறிஞர்கள் வலியுறுத்தியுள்ளனர். அப்துல் அசீஸ் அவர்கள் முஸ்லிம் வரலாற்றை விரிவாக எழுதியுள்ளார்.எம்.ஏ. நூஹ்மான் அவர்கள் “முஸ்லிம் தமிழ்” எனும் கருத்தை முன்வைத்துள்ளார். இதன் மூலம், மொழியிலும் கலாசாரத்திலும் முஸ்லிம்கள் தனித்துவம் கொண்டவர்கள் என்பதை நிரூபித்தனர்.

வடக்கு–கிழக்கு முஸ்லிம்கள் தமக்கென பாரம்பரிய தாயகம் கொண்டவர்கள் என்றும், அவர்களுக்கு அரசியல் சுயநிர்ணய உரிமை வேண்டும் என்றும் வலியுறுத்துகின்றனர். இதன் பொருள், அவர்கள் தேசியம் அல்லது தேசம் என்பதற்குரிய அடையாளத்தையும் உரிமைகளையும் கொண்டவர்கள் என்பது. தமிழரசு கட்சியின் ஆரம்ப ஆவணங்களிலும், எஸ்.ஜே.வி. செல்வநாயகம் அவர்களின் உரைகளிலும், மலையத் தமிழர்கள், சாதியப் பிரச்சினைகள், முஸ்லிம்கள் ஆகியோரின் தனித்துவம் ஏற்கப்பட்டிருப்பதை காணலாம்.

எனவே, இலங்கையின் இனப்பிரச்சினைக்கு எந்தவித தீர்வும்,
முஸ்லிம் சமூகத்தின் அரசியல், பொருளாதார, கலாசார உரிமைகளை மதித்தால்தான் நியாயமானதாகவும் நிலையானதாகவும் அமையும்.

முஸ்லிம் தேசியம் என்பது பிரிவினை அல்ல; அது சமத்துவத்தையும், அடையாளப் பாதுகாப்பையும் கோரும் குரலாகும் என்றார்.

இந்நிகழ்வில் பல்கலைக்கழக பீடாதிபதிகள், பேராசிரியர்கள், திணைக்களங்களின் தலைவர்கள், விரிவுரையாளர்கள், மாணவர்கள், ஆராய்ச்சியாளர்கள் மற்றும் அரசியல் ஆர்வலர்கள் பெருமளவில் கலந்துகொண்டு, தந்தை செல்வநாயகத்தின் அரசியல் சிந்தனைகளின் முக்கியத்துவத்தை மறுபடியும் நினைவு கூர்ந்தனர்.

இந்த செய்தியை நண்பர்களுடன் பகிர்ந்து கொள்ள...

எமது உத்தியோகபூர்வ பேஸ்புக் பக்கம்

importmirror.com

எமது செய்திகளை உடனுக்குடன் பேஸ்புக் மூலம் அறிந்து கொள்ள எமது பேஸ்புக் பக்கத்தை லைக் (like) செய்க!

முக்கிய குறிப்பு :

எமது இணையத்தளத்துக்கு அனுப்பிவைக்கப்படும் ஆக்கங்கள் , செய்திகள் என்பவற்றுக்கு அதனை அனுப்பிவைப்பவர்களே பொறுப்பாளிகள் ஆவர். தவறான அல்லது பிழையான, அவதூறு, பிறர் மனங்களை புண்படுத்தும் செய்திகள் அல்லது தகவல்களுக்கு எமது நிருவாகமோ இணையத்தளமோ பொறுப்பாளியல்ல. இதனைக்கருத்தில் கொண்டு தகவல் தொடர்புகளை மேற்கொள்ளுமாறு வேண்டுகின்றோம்.- நிருவாகம் -