எம்.வை. அமீர்,யூ.கே. காலித்தீன் –
சாய்ந்தமருது–மாளிகைக்காடு பிரதேச பைத்துஸ் ஸகாத் நிதியத்தின் 2026ஆம் ஆண்டுக்கான ஸகாத் மற்றும் வாழ்வாதார உதவிகளை பயனாளிகளுக்கு வழங்கும் நிகழ்வு, இன்று (13.09.2026) சாய்ந்தமருது–மாளிகைக்காடு முஹையதீன் ஜும்ஆ பள்ளிவாசலில் சிறப்பாக நடைபெற்றது.
“பைத்துஸ் ஸகாத் – சாய்ந்தமருது, மாளிகைக்காடு – ஸகாத் விநியோக வைபவம்” என்ற தொனிப்பொருளில் நடைபெற்ற இந்நிகழ்வில், ரூ. 9,664,900.00 நிதி ஒதுக்கீட்டில் மொத்தம் 148 பயனாளிகளை இலக்காகக் கொண்டு பல்வேறு ஸகாத் மற்றும் வாழ்வாதார உதவித் திட்டங்கள் முன்னெடுக்கப்பட்டிருந்தன.
சாய்ந்தமருது- மாளிகைக்காடு முஹையதீன் ஜும்ஆ பள்ளிவாசல் மற்றும் பைத்துஸ் ஸகாத் நிதியத்தின் தலைவரும், சாய்ந்தமருது வர்த்தக சங்கத்தின் தலைவருமான அல் ஹாஜ் எம்.எஸ்.எம். முபாறக் தலைமையில் நடைபெற்ற இந்நிகழ்வில், தைபா அரபுக் கல்லூரியின் பணிப்பாளரும், அம்பாறை மாவட்ட ஜம்மிய்யத்துல் உலமாவின் முன்னாள் தலைவருமான மௌலவி எஸ்.எச். ஆதம்பாவா (மதனி), சட்டத்தரணி எம்.சி. ஆதம்பாவா, பைத்துஸ் ஸகாத் நிதியத்தின் பிரதித் தலைவர் மௌலவி ஐ.எல்.எம். ரஃபி (ஹிழ்ரி), காழி நீதிபதி பொறியியலாளர் யூ.கே.எம். முஸாஜித், சாய்ந்தமருது முஹையதீன் ஜும்ஆ பள்ளிவாசல் செயலாளர் எம்.ஐ. அப்துல் அஸிஸ், பொருளாளர் ஏ.எம். சமீம், சாய்ந்தமருது ஜம்மிய்யத்துல் உலமா தலைவர் மௌலவி எம்.எம்.எம். சலீம் (சர்க்கி), செயலாளர் மௌலவி நப்றாஸ் ஹனிபா (ரஹ்மானி) உள்ளிட்டோர் கலந்துகொண்டனர்.
அத்துடன், பைத்துஸ் ஸகாத் நிதியத்தின் செயலாளர் யூ.எல்.எம். ஜௌபர், பொருளாளர் யூ.எல்.எம். ஹனிபா, உப செயலாளர் யூ.கே. காலித்தீன், சாய்ந்தமருது–மாளிகைக்காடு பிரதேச பள்ளிவாசல்களின் தலைவர்கள், செயலாளர்கள், வர்த்தக சங்க பிரதிநிதிகள், உலமாக்கள், சமூகப் பிரதிநிதிகள் மற்றும் முன்னாள் நம்பிக்கையாளர் சபைத் தலைவர் ஏ.எம். ஹிபத்துல் கரீம் உள்ளிட்ட பலரும் நிகழ்வில் பங்கேற்றனர்.
“இது பண விநியோக நிகழ்வு மாத்திரமல்ல”
நிகழ்வில் உரையாற்றிய பைத்துஸ் ஸகாத் நிதியத்தின் தலைவர் அல் ஹாஜ் எம்.எஸ்.எம். முபாறக், இந்நிகழ்வானது வெறுமனே பணத்தை பயனாளிகளுக்கு பகிர்ந்தளிக்கும் நிகழ்வு அல்ல என்றும், அது அமானத்தை உரியவர்களிடம் சேர்க்கும் பொறுப்பை நிறைவேற்றும் ஒரு முக்கியமான நாளாகும் என்றும் குறிப்பிட்டார்.
ஸகாத் நிதி என்பது தனிப்பட்ட ஒருவரின் பணமல்ல என்றும், அல்லாஹ்வின் கட்டளையின் அடிப்படையில் தகுதியுடையவர்களின் உரிமையாக ஒப்படைக்கப்பட்ட அமானத் என்றும் அவர் சுட்டிக்காட்டினார். அந்த அமானத்தைப் பாதுகாத்து, உரியவர்களை அடையாளம் கண்டு, அவர்களின் கண்ணியத்தைப் பாதுகாத்தவாறு உதவிகளைச் சென்றடையச் செய்வதே பைத்துஸ் ஸகாத் நிதியத்தின் பிரதான பொறுப்பு எனவும் அவர் தெரிவித்தார்.
பைத்துஸ் ஸகாத் நிதியத்தின் தலைமைப் பொறுப்பை தான் ஒரு பதவியாகக் கருதவில்லை என்றும், மக்களின் நம்பிக்கையைச் சுமக்கும் பொறுப்பாகவே கருதுவதாகவும் தெரிவித்த அவர், இந்தப் பணியில் தனிப்பட்ட நேரம், தொழில் மற்றும் குடும்பப் பொறுப்புகளுக்கு மத்தியிலும் முன்னுரிமை வழங்க வேண்டிய நிலை ஏற்பட்டதாகவும் குறிப்பிட்டார்.
வீடு தேடிச் சென்று பயனாளிகள் அடையாளம் காணப்பட்டனர்
ஸகாத் பெறுவதற்காக மக்கள் தாமாக முன்வந்து விண்ணப்பிப்பதை மாத்திரம் எதிர்பார்க்காமல், உண்மையில் தேவையுடையவர்களை அடையாளம் காணும் நோக்கில் பைத்துஸ் ஸகாத் நிதியத்தின் குழுவினர் பல்வேறு குடும்பங்களின் வீடுகளுக்குச் சென்று அவர்களின் உண்மை நிலைமைகளை நேரடியாக ஆய்வு செய்ததாக அல் ஹாஜ் எம்.எஸ்.எம். முபாறக் தெரிவித்தார்.
வறுமை, நோய், வேலைவாய்ப்பின்மை, குடும்பச் சுமைகள் மற்றும் பிள்ளைகளின் தேவைகள் உள்ளிட்ட பல்வேறு பிரச்சினைகளை நேரடியாகக் கண்டறிந்த பின்னரே பயனாளிகளுக்கான உதவிகள் திட்டமிடப்பட்டதாக அவர் குறிப்பிட்டார்.
வறுமையில் இருக்கும் பலர் தங்களுடைய நிலைமையை வெளிப்படையாகக் கூறுவதற்கு வெட்கப்படக்கூடும் என்பதால், “வறுமையில் இருப்பவர்களை அலுவலகத்திற்கு அழைப்பதை விட, தேவையுடயவர்களைத் தேடி அவர்களது வீடுகளுக்குச் செல்வோம்” என்ற அணுகுமுறை முன்னெடுக்கப்பட்டதாகவும் அவர் தெரிவித்தார்.
ரூ.96,64,900 நிதி – 148 பயனாளிகள்
2026ஆம் ஆண்டுக்கான திட்டங்களுக்காக பைத்துஸ் ஸகாத் நிதியத்தினால் ரூ. 96,64,900 நிதி ஒதுக்கீடு செய்யப்பட்டுள்ளதுடன், மொத்தம் 148 பயனாளிகள் இத்திட்டத்தின் மூலம் பயனடையவுள்ளனர்.
குடும்ப வாழ்வாதார உதவிகள், புதிய முஸ்லிம்களுக்கான உதவிகள், சிறு கைத் தொழில் மற்றும் சுயதொழில் முயற்சிகளுக்கான உதவிகள், தொழிற்பயிற்சி, சிறு கடைகள் மற்றும் வர்த்தக முயற்சிகளுக்கான உதவிகள் உள்ளிட்ட பல்வேறு தேவைகளை அடிப்படையாகக் கொண்டு உதவிகள் வழங்கப்படுகின்றன.
குறிப்பாக, குடும்ப வாழ்வாதாரத்தை மேம்படுத்தும் வகையில் 85 பேருக்கு முன்னுரிமை வழங்கப்பட்டுள்ளதுடன், வீட்டுத் தொழில், சுயதொழில், சிறு வர்த்தகம் மற்றும் புதிய தொழில் முயற்சிகளை ஆரம்பிக்க விரும்புவோருக்கும் தேவைக்கேற்ப உதவிகள் வழங்கப்படுகின்றன.
“ஸகாத் பெறுபவர் நாளை ஸகாத் வழங்குபவராக வேண்டும்”
ஸகாத் என்பது ஒரு குடும்பத்தின் உடனடித் தேவையைப் பூர்த்தி செய்வதற்கான நிதியுதவியாக மாத்திரம் மட்டுப்படுத்தப்படக் கூடாது என வலியுறுத்திய அல் ஹாஜ் எம்.எஸ்.எம். முபாறக், உதவி பெறுபவர்களை எதிர்காலத்தில் தன்னிறைவு அடையச் செய்வதே பைத்துஸ் ஸகாத் நிதியத்தின் முக்கிய இலக்காக இருக்க வேண்டும் என்றார்.
“இன்று ஸகாத் பெறுபவர், நாளை ஸகாத் வழங்குபவராக மாற வேண்டும். அதுவே ஸகாத்தின் மிகப்பெரிய வெற்றி” என்ற கருத்தை அவர் வலியுறுத்தினார்.
இதற்காக ஸகாத் பெறும் குடும்பங்களில் தொழில் செய்யக்கூடியவர்கள் யார், யாருக்கு சிறிய முதலீடு தேவைப்படுகிறது, யாருக்கு தொழிற்பயிற்சி அல்லது தொழில் கருவிகள் தேவைப்படுகின்றன, யாருக்கு வேலைவாய்ப்பு உருவாக்க முடியும், பிள்ளைகளின் கல்விக்கு எவ்வாறு உதவ முடியும் என்பன போன்ற விடயங்கள் ஆராயப்பட்டு, “இன்று எவ்வளவு வழங்கலாம்?” என்பதிலிருந்து “நாளை இவர்களை எவ்வாறு உயர்த்தலாம்?” என்ற சிந்தனைக்குத் திட்டங்கள் நகர்த்தப்பட வேண்டும் என அவர் தெரிவித்தார்.
வெளிப்படைத்தன்மைக்கு முக்கியத்துவம்
பைத்துஸ் ஸகாத் நிதியின் செயற்பாடுகளில் வெளிப்படைத்தன்மை முக்கியமான கொள்கையாக முன்னெடுக்கப்படுவதாகவும் அவர் குறிப்பிட்டார்.
மக்களால் வழங்கப்படும் ஸகாத் நிதி எவ்வளவு, அது எவ்வாறு செலவிடப்படுகிறது, யாருக்கு வழங்கப்படுகிறது, பயனாளிகள் எவ்வாறு தெரிவு செய்யப்படுகின்றனர் என்பன தொடர்பில் முறையான நிர்வாகம், கணக்கீடு, ஆய்வு மற்றும் நம்பகத்தன்மை அவசியம் என அவர் சுட்டிக்காட்டினார்.
சாய்ந்தமருது பைத்துஸ் ஸகாத் நிதியை எதிர்காலத்தில் இலங்கையில் ஒரு முன்னுதாரணமான ஸகாத் நிர்வாக அமைப்பாக உருவாக்க வேண்டும் என்பதே தமது கனவு என்றும் அவர் தெரிவித்தார்.
பயனாளிகளின் கண்ணியத்தைப் பாதுகாப்பது அவசியம்
ஸகாத் பெறுபவர்கள் தம்மைவிடக் குறைவானவர்கள் அல்லர் என்றும், அவர்கள் தமது சகோதரர்கள் மற்றும் சகோதரிகள் என்றும் குறிப்பிட்ட அல் ஹாஜ் எம்.எஸ்.எம். முபாறக், உதவி வழங்கும்போது அவர்களின் கண்ணியம் எந்த வகையிலும் பாதிக்கப்படாத வகையில் செயற்பட வேண்டும் என வலியுறுத்தினார்.
ஸகாத் உதவியை அவமானமாகக் கருதாமல், அது தகுதியுடையவர்களின் உரிமை என்பதை பயனாளிகள் உணர வேண்டும் என்றும், அதேவேளை கிடைக்கும் உதவியைப் பயன்படுத்தி தமது குடும்பங்களை படிப்படியாக தன்னிறைவு பெறச் செய்வதற்கு முயற்சிக்க வேண்டும் என்றும் அவர் கேட்டுக்கொண்டார்.
நிர்வாகக் குழுவினருக்கு நன்றி
இத்திட்டத்தின் வெற்றிக்குப் பின்னால் பைத்துஸ் ஸகாத் நிதியத்தின் நிர்வாகக் குழுவினரின் அர்ப்பணிப்பான உழைப்பு காணப்படுவதாகவும் தலைவர் குறிப்பிட்டார்.
பல வீடுகளுக்குச் சென்று குடும்பங்களின் நிலைமைகளை ஆராய்ந்து, பயனாளிகளை அடையாளம் காண்பதில் நிர்வாக உறுப்பினர்கள் நேரம் ஒதுக்கி பணியாற்றியுள்ளதாகவும், சில சந்தர்ப்பங்களில் பாராட்டுகளும் விமர்சனங்களும் வந்தபோதிலும் பொறுமையுடன் பணியாற்றியதாகவும் அவர் தெரிவித்தார்.
அத்துடன், பைத்துஸ் ஸகாத் நிதிக்கு நம்பிக்கையுடன் ஸகாத் வழங்கி வரும் சாய்ந்தமருது–மாளிகைக்காடு பிரதேச மக்களுக்கும் அவர் நன்றியைத் தெரிவித்தார். மக்களின் நம்பிக்கையே இந்நிறுவனத்தின் செயற்பாட்டுக்கு அடித்தளமாக இருப்பதாகவும் அவர் குறிப்பிட்டார்.
இளைஞர்களின் பங்களிப்பு அவசியம்
சமூக சேவையில் இளைஞர்களும் அதிகளவில் இணைந்து கொள்ள வேண்டும் எனவும் அல் ஹாஜ் எம்.எஸ்.எம். முபாறக் அழைப்பு விடுத்தார்.
தொழில்நுட்பத்தைப் பயன்படுத்துதல், தரவுகளை ஒழுங்குபடுத்துதல், குடும்பங்களின் தேவைகளை ஆய்வு செய்தல், தொழில் வாய்ப்புகளை உருவாக்குதல் போன்ற நவீன அணுகுமுறைகள் மூலம் ஸகாத் நிர்வாகத்தை மேலும் வினைத்திறன் மிக்கதாக மாற்ற இளைஞர்களின் பங்களிப்பு அவசியம் என அவர் தெரிவித்தார்.
“பைத்துஸ் ஸகாத் நமது சமூகத்தின் நிறுவனம்”
பைத்துஸ் ஸகாத் நிதியை ஒரு தனிநபரின் அல்லது தனிப்பட்ட நிர்வாகத்தின் நிறுவனமாகக் கருதாமல், முழு சமூகத்திற்கும் சொந்தமான நிறுவனமாகக் கருத வேண்டும் எனவும் அவர் வலியுறுத்தினார்.
தலைவர்கள் மற்றும் நிர்வாகிகள் காலத்திற்கேற்ப மாறினாலும், பைத்துஸ் ஸகாத் நிதியின் அடிப்படை நோக்கம் மாறக்கூடாது என்றும், அல்லாஹ்வின் திருப்திக்காக ஸகாத்தை முறையாகச் சேகரித்து, தகுதியானவர்களின் உரிமையை அவர்களிடம் கண்ணியத்துடன் சேர்ப்பதே அதன் நிரந்தர நோக்கமாக இருக்க வேண்டும் என்றும் தெரிவித்தார்.
வறுமையிலிருந்து தன்னிறைவை நோக்கி...
சாய்ந்தமருது–மாளிகைக்காடு பைத்துஸ் ஸகாத் நிதியத்தின் 2026ஆம் ஆண்டுக்கான இத்திட்டம், வெறுமனே நிதியுதவிகளை வழங்கும் ஒரு திட்டமாக இல்லாமல், சமூகத்தின் பொருளாதார ரீதியாக பின்தங்கிய குடும்பங்களை வறுமையிலிருந்து மீட்டு, அவர்களை சுயதொழில் மற்றும் வாழ்வாதார வாய்ப்புகளுடன் இணைத்து, எதிர்காலத்தில் தன்னிறைவு பெறச் செய்யும் நோக்கத்துடன் முன்னெடுக்கப்படும் முக்கியமான சமூக வலுவூட்டல் முயற்சியாக அமைந்துள்ளது.
ரூ.96,64,900 நிதி ஒதுக்கீட்டில் 148 பயனாளிகளை இலக்காகக் கொண்டு முன்னெடுக்கப்படும் இத்திட்டம், சாய்ந்தமருது–மாளிகைக்காடு பிரதேசத்தில் ஸகாத் நிதியை சமூக மேம்பாட்டுக்காக திட்டமிட்டு பயன்படுத்தும் ஒரு முக்கியமான முயற்சியாக அமைந்துள்ளது.
பைத்துஸ் ஸகாத் நிதியின் தலைவர் அல் ஹாஜ் எம்.எஸ்.எம். முபாறக் தெரிவித்ததுபோன்று, அதன் உண்மையான வெற்றி எவ்வளவு நிதி சேகரிக்கப்பட்டது என்பதில் மாத்திரமல்ல; அந்த நிதியின் மூலம் எத்தனை குடும்பங்களின் வாழ்க்கை மாற்றப்படுகிறது என்பதிலேயே தங்கியுள்ளது.
இன்றைய உதவி, நாளைய தன்னிறைவுக்கான முதலீடாக மாறி, இன்று ஸகாத் பெறும் குடும்பங்களில் சிலர் எதிர்காலத்தில் ஸகாத் வழங்கும் நிலைக்கு உயர வேண்டும் என்பதே இத்திட்டத்தின் நீண்டகால இலக்காக அமைய வேண்டும் என்ற எதிர்பார்ப்பு சமூக மட்டத்தில் உருவாகியுள்ளது.
0 comments :
Post a Comment