சூரிய கிரகணம் தெண்படும் போது இஸ்லாமிய வழிகாட்டல்களைக் கடைப்பிடித்து ஒழுகுமாறு, இலங்கை வாழ் அனைத்து முஸ்லிம்களிடமும் அகில இலங்கை ஜம் இய்யத்துல் உலமாவின் பிறைக் குழு வேண்டுகோள் விடுத்துள்ளது.
இது தொடர்பில் அ.இ.ஜ.உ. பிறைக்குழு விடுத்துள்ள விசேட அறிக்கையில்,
சூரியன் முழுமையாகவோ அல்லது அதன் ஒரு பகுதியாகவோ மறைவதை ஒருவர் நேரில் காணும்போது அல்லது பலரும் கண்டதாக அறிவிக்கும் போது, முஸ்லிம்கள் கிரகணத் தொழுகையில் ஈடுபடுமாறும் பொதுமக்களைக் கேட்டுள்ளது.
கிரகணத் தொழுகையைக் கூட்டாக நிறைவேற்றுவது, இஸ்லாத்தில் வலியுறுத்தப்பட்ட சுன்னத்தான வழி முறையாகும். ஆகவே, இதனைக் கூட்டாக நிறைவேற்றுவதற்கான ஏற்பாடுகளைச் செய்யுமாறும், பள்ளிவாசல் நிர்வாகிகளையும் ஆலிம்களையும், பிறைக் குழு வேண்டிக் கொள்கிறது.
வியாழக்கிழமை (26) வலைய சூரிய கிரகணம் (Annular Solar Eclipse) ஏற்படவுள்ளதாக, வானிலை அவதான நிலைய அறிக்கைகள் தெரிவிக்கின்றன. நிகழவிருக்கும் இச்சூரிய கிரகணம், இலங்கையின் பல பாகங்களிலும் பகுதி கிரகணமாகத் தெண்படும் அதேவேளை, சில மாவட்டங்களில் சில நிமிடங்கள் மாத்திரமே வலைய கிரகணமாகவும் தெண்படும்.
கொழும்பு நேரப்படி காலை 8:10 மணிக்கு பகுதி கிரகணம் ஆரம்பமாகி, காலை 11:24 மணியுடன் கிரகணம் நீங்கி, சூரியன் வழமையான நிலைக்குத் திரும்பி விடும் என்றும் வானிலை அவதான நிலைய அறிக்கைகள் சுட்டிக்காட்டியுள்ளமை குறிப்பிடத்தக்கது.
