குருநாகல் மாவட்டத்தின் ஹெட்டிபொல, கொட்டாம்பிடிய, மடிகே, அனுகன, கினியம பகுதிகளுக்கும் இன்றைய தினம் (15.05.2019) ஸ்தலத்திற்கு நேரடி விஜயம் மேற்கொண்ட புனர்வாழ்வு மீள் குடியேற்றம் வடக்கு அபிவிருத்தி முன்னாள் பிரதி அமைச்சரும் வன்னி மாவட்ட பாராளுமன்ற உறுப்பினருமான கௌரவ காதர் மஸ்தான் அவர்கள் அழிவுகளை பார்வையிட்டதுடன் நடந்த துயரமான சம்பவங்களை கேட்டறிந்து கொண்டார்.
வீடுகள்,கடைகள், பள்ளிவாசல்கள் உடைக்கப்பட்டு குர்ஆன் பிரதிகள் எரிக்கப்பட்டு மக்கள் பெரிதும் பாதிக்கப்பட்டுள்ளனர். நிர்க்கதி நிலையில் அச்சத்துடன் வாழ்ந்து வரும் நிலையில் அவர்கள் தமக்கு ஏற்பட்ட துயரங்களை கண்ணீர் மல்க விளக்கிக் கூறினர்.
பாதுகாப்பு விடயத்தில் கூடிய கவனம் செலுத்துமாறும் காலத்துக்கு காலம் புனித ரமழானில் காடையர்கள் கட்டவிழ்க்கும் வன்முறைக்கு ஒரு முடிவு காணுமாறும்,தமக்கேற்பட்ட இழப்புகளுக்கு நஷ்டஈடு வழங்குமாறும் அவர்கள் வேண்டிக்கொண்டனர்.
விடயங்களை வேதனையுடன் செவிமடுத்த பாராளுமன்ற உறுப்பினர் கெளரவ காதர் மஸ்தான் அனைத்து விஷயங்களையும் ஜனாதிபதியின் கவனத்துக்கு கொண்டுவருவதாக உறுதியளித்துடன் நஷ்டஈடுகளை துரிதமாக வழங்குவதற்கு நடவடிக்கை எடுப்பதாகவும் குறிப்பிட்டார்.
இந்நிகழ்வில் சிறீலங்கா முஸ்லிம் காங்கிரஸ் தலைவரும் அமைச்சருமான ரவுப் ஹக்கீம் அவர்களும் பிரசன்னமாகி இருந்தமை குறிப்பிடத்தக்கது.
