நேற்றுக் காலை தனது வர்த்தக தூதுக் குழுவினர் சகிதம் இலங்கைக்கு விஜயம் மேற்கொண்டு சுமார் நான்கு மணி நேரம் மாத்திரமே இங்கு தங்கியிருந்த அவர், வெளிவிவகார அமைச்சர் ரவி கருணாநாயக்க, பிரதமர் ரணில் விக்ரமசிங்க மற்றும் ஜனாதிபதி மைத்திரிபால சிறிசேன ஆகியோரை தனித்தனியாகச் சந்தித்து பேச்சுவார்த்தை நடத்தினார்.
ஜனாதிபதியுடனான சந்திப்பில் இலங்கையின் பொருளாதார அபிவிருத்தி குறித்து மகிழ்ச்சி வெளியிட்ட அவர், இலங்கையின் சுற்றுலாத் துறை உட்பட பல்லேறு துறைகளில் பாரிய முதலீடுகளைச் செய்ய தான் விருப்பம் கொண்டுள்ளதாகக் குறிப்பிட்டார்.
அத்துடன் இலங்கை முதலிடுவதற்கான சிறந்த களம் என்பதை ஏனைய சவூதி முதலீட்டாளர்களிடம் சிபார்சு செய்வதாகவும் இலங்கையில் உள்ள வர்த்தக வாய்ப்புகள் குறித்து சவூதி முதலீட்டாளர்களுக்கு தெளிவுபடுத்தும் நோக்கில் சவூதி அரேபியாவுக்கு விஜயம் செய்யுமாறும் அவர் ஜனாதிபதி மைத்திரிபால சிறிசேனவுக்கு அழைப்பு விடுத்தார்.
சவூதி அரேபியா தொன்றுதொட்டே இலங்கையின் பொருளாதார அபிவிருத்திக்காக வழங்கும் ஒத்துழைப்பை பாராட்டிய ஜனாதிபதி, அண்மையில் வெள்ளத்தால் பாதிக்கப்பட்ட இலங்கை மக்களுக்கு இளவரசர் வலீத் வழங்கிய நிதி உதவியையும் பாராட்டினார்.
அத்துடன் சவூதி அரேபியாவில் பணியாற்றும் சுமார் நான்கு இலட்சம் இலங்கையர்கள் நாட்டின் பொருளாதாரத்துக்கு பெரும் பங்களிப்பு நல்குவதாகவும் ஜனாதிபதி தெரிவித்தார்.
இச் சந்திப்பின்போது சவூதி இளவரசர் அல்வலீத் பின் தலால் பின் அப்துல் அஸீஸுக்கு ஜனாதிபதி மைத்திரிபால சிறிசேன விசேட விருதொன்றை வழங்கி கௌரவித்தமையும் குறிப்பிடத்தக்கது.
